Әріптестер мүдделестігі

Парламент Сенатының Төрағасы Қасым-Жомарт Тоқаев Қазақстанға жұмыс бабындағы сапармен келген Иордания Хашимиттік Корольдігі Парламенті Сенатының төрағасы Тахер әл-Масримен кездесті, деп хабарлады Парламент Сенатының баспасөз қызметі. Қазақстан-Иордания ынтымақ­тас­тығының қарқынды дамуын атап өте келіп, Қ.Тоқаев парла­мент­аралық өзара іс-қимылды қа­лыптастырудың маңыздылығын атап өтті. “Қазақстан Иорданияны Таяу Шығыстағы маңызды әріп­тес­терінің бірі ретінде қарастырады”, – деді Қасым-Жомарт Тоқаев. Ол екі ел арасындағы достық және әріптестік байланыстар Амманда Қазақстан Президентінің құрметіне көше берілуімен, ал Астана көше­ле­рінің бірі Иордания елордасы – Амман­­ның атымен аталуымен дәлелденіп отыр. Қ.Тоқаев Парламент қызметі, мемлекеттік институттар жүйесін­дегі Сенаттың рөлі мен ерекшелігі туралы әңгімеледі, Әлемдік және дәстүрлі діндер лидерлерінің съезі мен ЕҚЫҰ-ға төрағалық ету жө­ніндегі Қазақстанның халықаралық бастамалары туралы хабардар етті. Төраға сонымен қатар биылғы 1-2 желтоқсанда Астанада болатын ЕҚЫҰ Саммитіне әзірлік туралы да айтты. Оған қоса алдағы жылы Қазақ­стан Ислам Конференциясы Ұйымына төрағалық ететін болады. Қ.Тоқаев әріптесін 2012 жылы болатын дін лидерлерінің төртінші съезінің жұмысына құрметті мейман ретінде қатысуға шақырды. Кездесу барысында төрағалар Шығыс пен Батыс арасындағы үн­қа­тысуды одан әрі дамытуға, ис­лам­ның өркениетті  идеяларын іл­герілетуге мүдделіліктерін білдірді. Әл-Масри Иордания мен Қа­зақ­стан арасындағы екіжақты қатынастардың деңгейін жоғары бағалады және парламентаралық ынтымақтастықты жетілдіруді жақ­тайтынын айтты. “Екі елдің пар­ла­менттері демократиялық институт­тар және Иордания мен Қазақстан халқының өкілдері болып табы­ла­ды. Бұл тек ресми деңгейдегі ғана емес, біздің халықтарымыз арасын­дағы да қатынастарды дамытудың зор мүмкіндіктерін көрсетеді”, – деді мейман.