Азиада жаршысы

“Егемен Қазақстанның” VІІ Қысқы Азия ойындарына арналған сәрсенбілік беті Азиадаға 88 күн қалды ҚОЛДАУ ӘРҚАШАН КЕРЕК Қазір “2011 жылғы VІІ Қысқы Азия ойындарын ұйым­дастыру комитетінің атқарушы дирекциясы” АҚ алдағы жарысқа жан-жақты дайындалып жатыр. Бұл жұмыстардың бәрі 1 қарашадан бастап мемлекеттік қызметкерлердің санын қысқартуға байланысты жасалып жатқан шараларға қарамастан күнтізбеге сәйкес тиісті деңгейде жүргізілуде. Жақында аталмыш дирекцияның Мар­кетинг және ақпараттық имидждік қолдау басқармасының бастығы Данияр ТЕБАЕВПЕН кездесіп, әңгі­меге тартқанымызда ол соңғы кездері мынадай жұмыс­тардың атқарылғанын айтты. – Азиада жақындаған сайын оған дайындықтың көбейетіні бел­гілі. Соңғы кездері басқарма қан­дай жұмыстарды атқарды, біз біл­мей­тін қандай жаңалықтарыңыз бар? – Біздің басқарма Азиаданы сауатты жарнамалап, демеуші­лермен тығыз байланыста жұмыс істеу үшін құрылғанын білесіздер. Басқарма­ның бірінші бағыты, яғни Азиаданы маусым және жел­тоқсан айларында ақпараттық қол­дау, жарысқа дайындықты насихат­тауда медиа-жоспар әзірлеу бойын­ша жұмыстар істелініп жатыр. Со­ны­мен бірге бізде жол медиа-карта­сы деген бағытымыз да бар. Онда Азия ойындарын жар­намалаумен бірге, халық арасында саламатты өмір салтын насихаттау қарас­ты­рыл­ған. Ал басқарманың екінші ба­ғыты, яғни маркетингтік жұмыс­та демеу­шілер мен әріптес­тер табу­ға баса назар аударылып отыр. Насихат жұмысы тиісті деңгейде жүр­гізіліп жатыр дей аламын. Мә­се­лен, 7 қыркүйек пен 30 қазан ара­лығында отандық және шетелдік мерзімді басылымдарда Ойындарға арналған көптеген материалдар шықты. Республи­калық екі ірі ба­сы­лым – “Егемен Қазақстан” мен “Казах­стан­ская правдада” апта са­йын Азиадаға арнаулы бет жария­ланып тұрады. Ал телевизияға кел­сек, он ұлттық телеарна мен төрт опера­торлық ка­бель­ді телеви­дениеде 40 бейнеро­ликтер, 9 имидж­­дік шаралар мен 209 бейне­сюжеттер жасау жоспар­ланған бо­ла­тын. Қазір солардың бәрі істелі­ніп жатыр. – Азиадаға демеушілер тарту мәселесі қалай шешіліп отыр? – Біздің жұмыстың тағы бір бағыты – демеушілер мен мүдделі әріп­тестер табу, олармен тиімді келі­сім-шарт жасау болғандықтан, осы жұмысқа басқарма құрыл­ғаннан бері баса назар аударылуда. Әрине, Үкімет тарапынан Азиадаға қомақты қаржы бөлінді. “Самұрық-Қазы­на” қоры Ойындардың бас­ты демеу­шісі болды. Дегенмен, Азиа­да кезін­де іс-шараны ұйым­дас­тыру және өткізу демеушілер мен серік­тестер іздестіру, отандық кә­сіп­керлерді осындай ірі шараға қа­тыс­тыру, олар­ды ынта­ландыру ма­ңы­з­ды жұмыс­тардың бірі болып та­былады. Сон­дық­тан біз 15 мың­нан астам отандық шағын және орта бизнес өкілдеріне ұсыныстар жі­бер­дік. Шетелдік ком­панияларға да ұсыныстар таратылды. Қазір ше­тел­діктердің ішінде тағы екі ком­пания демеуші болуға ынта білдіру­де. Олар – “Phіlіps Electro­nіcs” және жапон­дық “Mіtsubіshі” ком­паниясы. Гол­лан­диялықтар “Ме­деу” мұз айдыны, Балуан Шо­лақ атындағы спорт са­райы, Ал­маты облысындағы шаңғы-биатлон ста­дионына жаңа құрал жаб­дықтар ор­натып жатыр. Ал олар­дың де­фи­брилляторлары “Эйр Астана” әуе компаниясының борттарында тұр. Әңгімелескен Дастан КЕНЖАЛИН. Суретті түсірген Орынбай БАЛМҰРАТ. * * * ИНТЕРНЕТ-БЕЙНЕАРНА БАР ЕКЕНІН БІЛЕСІЗ БЕ? “Compass GmbH” маркетинг агенттігі Қазақстанға және 2011 жы­лы Астана мен Алматы қала­ла­рында өтетін Қысқы Азия ойын­­дарына арналған интер­нет-бейне­арна ашқанын хабарлайды. Осы жылдың 31 тамыз күні рес­ми түрде тіркелген бейнеарна 52 күн­нің ішінде Еуропа елдеріне кеңі­нен танылып үлгерді. Соңғы мә­лі­мет­терге қарағанда, оның “Көк­­­­жиек­те – Қазақстан!” тақы­ры­­бын­дағы бейнесюжеттері­мен қазірдің өзінде 97 334 адам таныс­қан. Соның ішінде бейне­арнаға кірушілердің көбі 12 қазан күні “Астана-Арена” ста­дио­нында Қа­зақ­стан мен Германия құ­ра­ма­ларының арасында өткен фут­бол матчына қызығушылық та­ныт­са, Германияның орталық теле­ар­на­лары осы ойының алдында Қазақ­станда Азиаданы өткізу үшін салып жатқан спорт нысандарының да­йын­дығына жылы пікірлерін білдірді. Қазір Германияның ақпарат құралдары Алматыда шаңғымен тұ­ғыр­дан секіруге салынған халық­аралық кешенінің, Солдат шатқа­лындағы шаңғы-биатлон кешені, қайта күрделі жөндеуден өтіп жатқан “Шымбұлақ” базасы мен “Ме­деу” мұз айдынының, Астана­дағы велосипедшінің шлеміне ұқсас салынған республикалық велотрек пен коньки тебу стадионының құ­ры­­лысын жоғары бағалауда. “Алдағы кезде бейнеарнаны ағыл­шын тілінде де жасау жос­парымызда бар. Бейнеарнаны http: //www.­youtube.com/user/Kasachtan Tourіsmus мекен-жайынан көру­леріңізге болады”, ­– дейді оның мамандары. “Compass GmbH” маркетинг агенттігі. Кельн, Германия. * * * ОНДЫҚҚА ТИГЕН ОН ӘН Биылғы жылғы 24 тамызда Қысқы Азия ойындарына арналған әнұранның сөзі мен музыкасын жазуға байқау басталғаны белгілі. Әнұран алдағы Ойындардың бітімгершілік және топтастырушылық әлеуетін көрсетуге арналған. Байқау іріктеу кезеңі (байқауға жұмыстарды қабылдау) мен шешуші кезеңнен (жұмыстарды қарау және үміткерлерді анықтау) тұрды. Байқауды өткізу ту­ра­лы ережеге сәйкес ән­ұран Азиада іс-шара­ла­рында жеке және ұжым­­дық орындауға ар­налған ұзақтығы 5 ми­нөттік му­зыкалық шы­ғар­ма болуы керек. Бай­қауға қатысуға әнұран сөзінің тек түп­нұс­қа­лары қабылданды. Ән­ұран мәтіні қазақ, орыс және ағылшын тіл­де­рін­де жазылуы тиіс. Ән  Азия олимпиялық кеңе­сінің конституция­сына, фило­софиясына, құн­дылықтарына, құқықтық, адамгершілік және өнегелілік нормаларына сәйкес келуі керек. Бірінші кезеңде Ұйымдастыру комитетіне 105 байқау жұмысы келіп түсті. Олардың ішінде 49 ән қазақ, 45-і орыс және басқа тілдерді қам­тыған 11 музыкалық композиция болды. Байқау­ға қа­тыс­қандардың ішіндегі жас мөлшері үлкені – Ал­маты қаласынан 72 жастағы зейнеткер, ал ең жа­сы Шымкент қаласынан 17 жасар оқушы. Екінші кезеңде Байқаудың ұйымдастыру комитетінің отырысы өтті. Білікті қазылар алқасы 10 үздік байқау жұмысын іріктеп алды. Олар­дың ішінде Ескендір Хасанғалиевтің “Азиа­да алауы”, Кеңес Дүйсекеевтің “Азиада-Қазақ­стан”, Нұржан Теңізбаевтың “Қазақ­стан”, Бақ­тияр Құсайыновтың “Ел намысы”, “Мис­терионс” тобының “Азиада”, Мақсат Жәу­тіковтің “Спорт”, Естай Әлекеевтің “Алға, Қазақ­стан”, Дүйсенхан Сыздықовтың “Азиада алауы”, Иван Бреусовтің “Азиада” және Еркеш Шәкеевтің “Азиада” әні бар. “Әрбір байқау жұмысын біз жеке-жеке қара­дық. Жалпы ал­ғанда, музыкалық ком­позициялар бір-бірі­не ұқсамайтын, қы­зықты болды. Біз орын­даушылар мен ком­позиторлардың шы­ғар­­маларға жаңа қы­рынан келгенін бай­қадық. Бірақ көп­­те­ген әндерде ән­­ұранға тән салта­нат­тылық байқал­мады, кейбір музыкалық жұмыс­тарда, өкі­ніш­ке орай, көтерің­кілік болма­ды. Ұзақ пікір­талас пен талқы­лаудан кейін біз қазақ­стан­дықтардың өздері Азиаданың әнұраны ретінде таңдап алатын 10 үздік композицияны іріктедік, ­­- дейді Азия ойындарының ресми әнұранын жазуға арналған байқаудың ұйым­дастыру комитеті төрағасының орынбасары, эстрада әншісі, композитор Жеңіс Сейдолла. Азиаданың әнұраны осы 10 жұмыстың ішінен смс-дауыс беру арқылы іріктелетін болады. 1 қарашадан бастап “Қазақ радиосы”, “Радио NS”, “Сәлем радиосы” эфирлерінде дауыс беру басталды. Онда әрбір қазақстандық өзінің пікірі бойынша Азиаданың әнұранына лайық деп ұнатқан музыкалық компози­циясына Азиаданың ресми ұялы байланыс операторы Kcell компаниясы ұсынған 1212 нөміріне смс жіберу арқылы дауыс бере алады. Дауыс беру 20 қарашаға дейін жалғасады. 1 желтоқсанда Азиаданың ұйымдастыру ко­митеті отандастарымыздың таңдауы бойынша Азиаданың ресми әнұраны болып табылатын музыкалық композицияны жария етеді. Байқаудың серіктестері Астана мен Алматы қалаларының әкімдіктері, GSM Қазақстан/Kcell ұялы байланыс операторы, “Қазақстан” РТРК”, “Мирас спорт” ҚҚ болды. * * * МЕДИЦИНА МАМАНДАРЫ Қысқы Азия ойындарында қандай қызметтер көрсете алады?! Қысқы Азия ойындарын ұйым­дастыру комитеті Азиаданың Меди­циналық қамтамасыз ету бағдар­ламасы мен допингке қарсы бағдарла­масын әзірлеп, бекітті. Атап айтқанда, допингті бақылау қызметінің ұйымдастыру құрылымы құрылды. Қазіргі уақытта оны қадағалаудың 30 инспекторы мен 81 көмекшісі іріктеліп, дайындықтан өтті. Ойындарды ұйымдастыруға жұмылдырылған әрбір спорт нысанында халықаралық стан­дарттардың талаптарына сәйкес тиісті жабдық­тармен допингті бақылау стансалары орнатыла­тын болады. Әлемдік рекорд пен Азия рекордын жаңартқан барлық спортшылар, медаль иеленгендер, сондай-ақ алдын ала және шешуші жарыстар кезінде кездейсоқ іріктелген спорт­шылар міндетті түрде допингтен тексерілу тестінен өтетін болады. Қадағалау мен бақылау алдын ала ескертусіз кез келген жерде және кез келген уақытта өткізіледі. Денсаулық сақтау министрінің бұйрығына сәйкес спортшыларға, Ойындардың отбасы мүшелеріне және басқа да тіркелген адамдарға тегін медициналық қызмет көрсетуді көздейтін Астана қаласындағы алты және Алматы қаласындағы он медициналық ұйымымен шарт жасалды. Санитарлық шаралар мен тұмау, аллергияға көмекке арналған медициналық пункттер   жарыстарды өткізу орындарында, спортшылар мен аккредитацияланған адамдар тұратын қонақ үйлерде, баспасөз орталық­тарында және Ойындардың іс-шаралары ұйым­дастырылған басқа да жерлерде 2011 жылғы 15 қаңтардан 15 ақпанға дейін қызмет көрсетеді. * * * Тимоти Фок, Азия олимпиялық кеңесінің вице-президенті: ДАЙЫНДЫҚТАРЫҢЫЗ ЖАҚСЫ  ЕКЕН! Жақында елімізге Азия олимпиялық кеңесінің де­ле­гациясы келіп, Астана мен Алматыда Азия ойын­дарына арналған спорт ке­шендерінің құрылысымен танысты. Астанада құрлықтық ұйымның құрметті қонақтарын Туризм және спорт вице-министрі Талғат Ермегияев, “2011 жылғы Қысқы Азия ойындарын ұйымдастыру жөніндегі комитетінің атқарушы дирекциясы” АҚ-пен қалалық әкім­діктің өкілдері спорт нысан­дарына алып барды. Содан кейін АОК вице-президенті Тимоти Фок, осы ұйымның спорт коми­тетінің төрағасы Джан Джилонг, Азия ойындары департаментінің жетекшісі Хайдар Фарман, Ха­лық­­аралық және ұлттық олим­пия­лық кеңесінің жетекшісі Лиу Вей Азиаданы ұйымдастыру коми­тетінің дирекциясына келіп, құры­лыс нысандарының дайындығына ризашылығын білдірді. Осы жерде Т.Ермегияев пен ди­рек­ция басшылары және үстел басында әңгіме қозғаған қонақтар ойындарды ұйымдастыру, көлік құралдары қызметінің жүйесі, медициналық тексеру, антидо­пинг, жарысқа тіркеу, спорт орда­ларының құрылысы біткен соң ол жерлерде халықаралық сертифи­кат алу үшін сынақ жарыстарын өткізу сияқты мәселелерді талқы­лады. Кездесуден соң АОК өкілі Тимоти Фок Азия ойындарына дайындық туралы мынадай пікірін білдірді. – Спорт нысандарын аралап көрдіңіздер, пікірлеріңізді білуге бола ма? – Әрине. Біз алдымен “Қазақ­стан” спорт сарайына бар­дық. Бұл жерде ерлер арасындағы шайбалы хоккейден жарыстың өтетіні белгілі. Бізді әуелі командалық жарысты Қазақстанның қай деңгейде өткізетіні қызықтырды. Осы жерге барғанымызда спорт сарайының негізгі алаңы мен оның жанында жаңадан салынып жатқан қосалқы мұз айдынының дайындығына көз жеткіздік. Со­дан кейін коньки тебу ста­дио­ны мен мәнерлеп сырғанау және шорт-трек жарыстары өтетін рес­публикалық велотрек құры­лысы да көңілімізден шықты. Велотрек­тің тағы бір ұнаған жері, ол спорт­шының бас киімі, яғни шлемі сияқ­ты салынып жатыр екен. Мұн­дай архитектуралық құрылыс­ты мен әлі еш жерден көрген жоқпын. – Азиаданың ашылу салта­наты өтетін “Астана-Арена” стадионында көп тұрдыңыздар ғой, оның қай жағын байқады­ңыздар? Жақсы жағын ба, әлде кемшіліктері болды ма? – Бұл нысан әлемдік талап­тар­ға сай салынған екен. Сондық­тан біз оны асықпай аралап көрдік. Менің айтайын дегенім, 30 мың көрермен үшін бұл ең жақсы спорт нысаны. Ал жалпы, бізді Қазақстанның Азиадаға жақсы дайындалып жатқаны қуантты. Ертеңгі күні осы спорт ареналар­дың бәрі өздеріңізде қалады. Бұл жерде әлі талай дүбірлі жарыс­тардың өтетініне сенемін. Ең бас­ты­сы, өскелең ұрпақ үшін салып жатқандарыңызға қатты ризамыз. Ал АОК Қазақстанда өтетін жа­рыс­тарды үнемі бақылап тұратын болады. Енді 2017 жылы Қысқы Универсиада да Қазақстанда өтетіні шешіліп отыр. Осы бәсеке­де тағы кездесеміз деп ойлаймын. * * * АЗИАДА АЙШЫҚТАРЫ 7-25 қазан аралығында Алматы мара­фоншылар клубының мүшесі, былтыр Фин­ляндияның Лахти қаласында өткен әлем чемпионатына қатысушы, дүние жүзін­дегі 20 үздік марафоншының қа­тарына кіре­тін отандасымыз Дулат Иман­қажы жал­ғыз өзі “Алматы – Балқаш– Қара­ғанды – Астана” бағытымен жеңіл атле­тикалық ма­ра­фон жүгірісіне қатыс­ты. Ол бұл сапа­рын Азиада құрметіне ар­нағанын айтты. Сөйтіп, ол 19 күнде 1500 шақырымды жүгіріп өтті. Оның жүгіру жолы 7 қазанда Алматы-2 вокзалының алаңындағы Абылай хан ескерт­кішінен басталып, Алматы, Қарағанды және Ақ­мола облыстарының 17 елді-мекенін қамтыды. Марафоншының айтуынша, Алматы мен Астана аралығындағы жол аялдаған жерлерді есепте­мегенде уақыт 136 сағатты алды. Марафон кезінде оның жанында арнайы көлік жол серігі еріп жүрді. Сапар барысында оның демеушілері мен әкімдік өкілдері азық-түлікпен, жатын орынмен қамта­масыз етті. Д.Иманқажы 43 жаста, марафонмен 4 жылдан бері айналысып келеді. 16 жыл бұрын бокс және кигбоксингпен шұғылданған. Ол Қазақстан Респуб­ликасының спорт шеберлігіне үміткер. * * * ДЕРЕКТЕР НЕ ДЕЙДІ? Шорт-трек – коньки спортының бір түрі­не жатады. Ол ағылшын тілінен аудар­ғанда “қысқа қашықтық” (short track) деген мағынаны білдіреді. Мұнда конькишілер жылдам­дыққа жарысады. Бірақ ұзақ қа­шықтыққа емес, қысқа қашық­тық­қа. Шорт-трек ресми түрде 70-жыл­дардың ортасында таныла бастаға­нымен 40-жылдардың өзінде Жапо­ния мен Австралия онымен жақсы айналысқан деген дерек бар. Сон­дықтан болар, қазір Қысқы Олим­пиа­да мен Азиадада күншығыс елінің өкілдері ешкімге дес бермейді. Шорт-трек Олиимпиада бағ­дар­ламасына 1992 жы­лы кірді. 1981 жылдан бастап одан әлем чем­пио­наты өткізіле бастады. Қазақ­станда бұл спорт түрі 1985 жылы Ақтөбе мұз спорт сарайы­ның жанында пай­да болды. Сол кезде осы спортпен айналысамын де­ген балалар үйірмелерге алын­ды. Содан бері КСРО жә­не Қазақстан құрамасының сапында өнер көр­сет­кен С.Кирпичев, В.Потрасенко, А.Петровский, В.Си­д­оров, О.Кривеченко, Е.Си­ницина, Н.Шмати­чина, О.Крав­ченко, В.Петрасенко одақтық және рес­пуб­ликалық жарыстарда жүлделі орындарды алып жүрді. 1993 жылы Қазақстан алғаш рет әлем чемпионатына қатысты. Осы бәсекеде Е.Синицина еліміз­ге 1994 жылы Лиллехам­мерде өткен Олимпия ойындарына жол­дама алып берді. * * * ҚОНАҚ ҮЙ VІІ Қысқы Азия ойындарына келушілерге дайын Астанада “Рамада Плаза Астана” халық­аралық қонақ үйін Қысқы Азия ойындарының серіктесі ретінде таныстыруға арналған рәсім өтті. Онда “2011 жылғы VІІ Қысқы Азия ойын­дарын ұйымдастыру комитетінің атқарушы ди­рек­циясы” АҚ вице-президенті Абзал Әлібеков ұйымдастыру комитеті­нің қонақ үйлерді мұқият сұрып­тағанын, Алматыда 19 қонақ үй, Астанада 9 қонақ үй іріктел­генін, оларды таңдау кезінде ыңғай­лылық деңгейіне, нөмірлердің сы­йымды­лығына, ор­наласқан жері­не, лайықты тағаммен қамта­ма­сыз етуіне, қауіпсіздігіне және қызмет көрсету жағына баса назар аударыл­ғанын атап өтті. Осылай дей келіп, ол “Рамада Плаза Аста­на” қонақ үйінің Азия олим­пия­лық кеңесінің барлық критерий­лері мен халықаралық талап­тары­на сәйкес келетінін мәлім етті. Оның айтуынша, жасасқан ын­тымақтастық шартының шеңберін­де “Рамада Плаза Астана” қонақ үйінде ҰОК-тің президенті, бас хатшы­лар, шетел делегациялары­ның басшылары мен олардың атқосшылары орналастырылмақ. Ол үшін қонақ үй ойындарды өт­кізу кезінде ұйым­дастыру коми­тетінің қажеттілігі үшін 200 нөмір бөледі. Ал рәсімде сөйлеген сөзінде “Рамада Плаза Астана” қонақ үйінің бас менеджері Джем Джи­риджи Азия ойындарының серіктесі болғаны үшін қуанышты екенін, бұл мүмкіндік олар үшін үлкен құрмет болып табылатынын айтты. “Біз алдымызда қандай жауап­кершілік тұрғанын сезіне отырып, Азия ойындарының барлық қо­нақтарын лайықты, жоғары дең­гейде күтіп алатынымызға кепілдік береміз. Сондай-ақ, мен Қысқы Азия ойындарының ұйымдастыру комитетіне Қазақстан үшін тарихи маңызды спорттық оқиғаға қаты­суға бірегей мүмкіндік бергені үшін алғысымды білдіргім келеді”, – деді ол. Анықтама: “Ramada Plaza Astana” 1996 жылы “Okan Іnter­Contіnental Astana” деген атпен құрыл­ды. Қонақ үй кәсіби мене­джменті, тәжірибелі мамандары және Қазақстан Республикасында туризм индустриясына қосқан үлесі үшін бірнеше мәрте марапатталды. Биыл қонақ үй дүние жүзінде 7000 қонақ үйді басқаратын Амери­кадағы қонақ үйлердің атақты тобы болып табылатын “Wyndham Hotels Group”-тың құрамына енді. Бетті дайындаған Дастан КЕНЖАЛИН.