Ескі тараудың соңы, жаңа тараудың басы

Парламент Сенатының Төрағасы Қасым-Жомарт Тоқаев Еуропа Парламентінің депутаттары мен Демократия және ынтымақ жолындағы еуропалық форум өкілдерін қабылдады, деп хабарлады осы палатаның баспасөз қызметі. Кездесу барысында әлемдегі тұрақтылық пен қауіпсіздікті қам­та­масыз етудегі ортақ қадамдарды әзірлеу, Қазақстан мен Еуро­одақ­тың тұрақты және тең құқықтылық негізіндегі ынтымақтастығын одан әрі қалыптастыру жөнінде пікір алмасылды. Сонымен бірге, алдағы өзара іс-қимылда сауда-экономикалық ба­ғыт­пен ғана шектелмей, әлеуметтік қауіпсіздік, адам құқықтарын қор­ғау, демократиялық реформаларды ілгерілету салаларындағы белсенді ынтымақтастықты қосу туралы да айтылды. Төрағаның айтуынша, Прези­дент Н.Назарбаевтың таяудағы Брюс­сельге сапары барысында Қа­зақстан мен Еуроодақ арасында қол жеткен ілгерілеу әріптестігі туралы жаңа келісімді бекіту жөніндегі уағдалас­тықтармен Қазақстанның Еуроодақ­пен ынтымақтастығын дамытудың жаңа парағы ашылатын болады. Мемлекеттік “Еуропаға жол” бағ­дарламасы сонымен бірге, эко­номикалық әріптестікті одан әрі ке­ңейтуге, саяси реформаларды іл­ге­рілетудің еуропалық тәжірибе­сі­мен үйлестіруге, азаматтық қоғам­ды дамытуға бағдарланған. Парламентаралық байла­ныс­тар­ды одан әрі нығайтуға қатысты Қ.Тоқаев Парламенттік ынты­мақ­тас­тық комитеті деңгейіндегі “Қа­зақстан Республикасы-Еуропалық Одақ” үнқатысуының табысты бо­ла­тынын атап өтіп, ЕҚЫҰ ая­сын­дағы қазақстандық және еуропалық парламентшілердің өзара іс-қимылын жоғары бағалады. Осыған байланысты Төраға ЕҚЫҰ Саммиті қарсаңында биыл­ғы 30 қарашада Астанада болатын ЕҚЫҰ Парламенттік Ассамблеясы бюросының алдағы отырысының маңыздылығын атап өтті. Еуропа Парламентінің вице-президенті Адриан Северин кездесу қорытындысы бойынша болған сұхбатта Орталық Азия аймағын­дағы тұрақтылықты қамтамасыз ету­дегі Қазақстанның негізгі рөлін атап өтті және біздің еліміздің ЕҚЫҰ-ға төрағалық ету барысын жоғары бағалады. “Қазақстанның даму тарихында ЕҚЫҰ Саммиті ескі тараудың соңы, екінші жағынан халықаралық істерге қатысудағы, жаңа қауіпсіз әлем құрудағы жаңа тараудың басы болып табылады”, – деді пар­ламентші.