Төтенше жағдайдың алдын алу ұтымды

Кеше Мәжіліс Төрағасының орынбасары В.Бобровтың жетекшілігімен Үкімет сағаты болып, онда Төтенше жағдайлар министрі В. Божко “Азаматтық қорғаныс жүйесін жетілдіру жөніндегі шаралар туралы” деген тақырыпта баяндама жасады. Келтірілген мәліметтерге қарағанда, төтенше жағдайлардан зардап шеккендердің жалпы санын 4,8 пайызға дейін азайтуға қол жеткізілген. 2010 жылдың 9 айында 7954 адам құтқарылса, төтенше жағдайлар ай­ма­ғынан 10173 адам эвакуацияланыпты. Мы­салға, Шығыс Қазақстан облысында орын алған қар бұрқасыны кезінде авто­жолдарда қалып қойғандарды құтқару жүргізіліп, 538 адам аман қалған. Осы өңірдегі жойқын апатты су тасқынынан 689 адам құтқарыл­ған. Ал Алматы облысы Ақсу, Егінсу, Қызылағаш және Алажиде ауылдарында 385 адам аман алып қалынған. Жоғарыларды ескере келе, аталған министрлік “Азаматтық қорғау туралы” заң жобасын әзірлеп жатқаны белгілі болды. Сырдария өзенінде Көксарай су реттегі­шін пайдалануға берудің арқасында 920 миллион текше метр су жинауға қол жеткі­зіліп, сондай-ақ 400 мыңнан астам тұрғыны бар Қызылорда және Оңтүстік Қазақстан облыстарының 71 елді мекенін су басу қау­піне жол берілмеді, деді Владимир Кар­по­вич. Мұндай құрылғы Астана қаласы маңын­да да жүргізілуде. Оның айтуынша, 0,5 миллиард текше метр суды тоқтату мүмкіндігі бар ұзындығы 31 шақырымнан асатын тасқын суға қарсы бөгенді тұрғызу аяқталған. Елорданың сол жағалауын және қала сыртын су басудан қорғайтын Астана су қоймасы көктемде 30 миллион текше метр суды тоқтатуға мүмкіндік берген. 580 дала және 627 орман өрттері сөндірілсе, оған мемлекеттік өртке қарсы қызметтің 3273 қызметкері мен 635 бірлік техникасы және 5 тікұшақ жұмылдыры­лыпты. Ресеймен арадағы шекара бойын­дағы өрт сөндіруде бірлесе әрекет ету жүзеге асқан. Министр еліміздегі ірі кәсіп­орындардағы өнеркәсіптік қауіпсіздікті қамтамасыз ету мәселелерін де сөз етті. “Арселор Миттал Теміртау” АҚ-пен бірлесе өткізілген жұмыс барысында ұңғылау, бұрғылау және желдеткіш жабдықтар үшін соңғы екі жылда 409 миллион АҚШ дол­лары бөлінген. Ал “Қазақ­мыс корпора­циясы” ЖШС осы мақсаттарға 33 миллион доллар жұмсаған. Тек үстіміздегі жылдың 10 айы ішінде елімізде индустриялық қауіп көзі болып табылатын жабдықтың 523 бірлігі және 52 технологиялық желілері ауысты­рылған. Сол сияқты, осы уақыт аралығында Каспий теңізінің қайраңынан мұнай өндірумен айналысатын 34 кәсіп­орын­дағы 273 нысанға тексеру жүргізіліп, 617 өнер­кәсіп қауіпсіздігі талаптарының бұзушы­лығы анықталыпты. Соның нәтижесінде 56 лауазымды тұлға жауапкершілікке тартылған. Президент тапсырмасын орындау үшін Қырғыз Республикасындағы әлеуметтік-экономикалық ахуалды тұрақтандыру мақсатында үстіміздегі жылы жанар-жағар май және құрылыс материалдары, тамақ өнімдері және гигиена құралдары түрінде 7 миллион 488 мың 105 АҚШ долларына тең көлемде ізгілік көмегі көрсетілген. Сонымен қатар, 5 миллион 859 мың 111 АҚШ долла­рына 230 мың тонна көмір жөнелтіліпті. Үстіміздегі жылы Тәжікстан, Ауғанстан және Молдоваға ізгілік көмегін көрсету үшін жалпы сомасы 13 миллион 82 мың 507 АҚШ доллары жұмсалған көрінеді. Үкімет сағатында депутаттар министр на­зарын шахталардағы қауіпсіздік мәсе­ле­сі­не, әсіресе, оларды байланыспен қа­м­та­масыз етуге, дала өрттерінің алдын алуға қа­ж­етті техникалар сатып алу жайына, деполар санын арттыруға және өзге де көптеген мәселелерге аударды. Асқар ТҰРАПБАЙҰЛЫ.