Дәлелдеуді қажет етпейтін бір ақиқат бар, ол, ең алдымен, уақытқа тікелей қатысты. Анығырақ айтқанда, өз уақытын үнемдей білген және ұтымды пайдаланған адам ғана бірқатар шаруаны шұғыл түрде бітіре алады. Сонымен, бұдан былай алтынға пара-пар уақытты үнемдеудің тиімді жолы – электронды сандық қолтаңба болмақ.
Кеше Ақпарат және байланыс министрлігі Электронды сандық қолтаңбаны (ЭСҚ) жеделдетіп беру акциясын бастады. Бұл акцияның ашылу салтанаты оңтүстік астанадағы “Мега-Алматы” сауда-ойын-сауық орталығында өтті. Республикадағы алғашқы жаңа жоба – электронды сандық қолтаңба акциясын Байланыс және ақпарат министрі Асқар Жұмағалиев бейнеконференция арқылы ашып, сөз сөйледі.
– Атап айтарлығы, “NON-stop ЭКЦ” жаңа жобасы, яғни электронды сандық қолтаңбасының өзінің уақытын бағалайтын әрі қадірлей білетін әрбір қазақстандық үшін маңыздылығы жоғары. Сондықтан да, еліміздегі тұрғындардың электронды сандық қолтаңбаға ие болуы қажет, өйткені оның күнделікті тіршілікте көмегі мол екендігі сөзсіз. Мәселен, оның көмегімен интернет арқылы электронды мемлекеттік қызмет түрлеріне қол жеткізе аласыз, – деді министр .
“Мега-Алматы” сауда-ойын-сауық орталығына келіп, жаңа жобаның ашылу салтанатына қатысқан өнер шеберлері, шоу-бизнес және ІТ саласы өкілдеріне электронды сандық қолтаңба салтанатты түрде тапсырылды. Олардың арасында Қазақстанның еңбек сіңірген әртісі Ерлан Көкеев, шолушы Андрей Сьедин, актриса Ольга Ландина және басқалар бар. Қонақтар бұл акцияға қатысу себептерін өздерінің жаңа технологияға қызығушылық танытуларымен және келешекте электронды сандық қолтаңбаны пайдалану арқылы жаңа мүмкіндіктерге қол жеткізгісі келетіндіктерімен түсіндірді.
Шын мәнісінде де, “Электронды үкіметтің” ұсынып отырған қызметтері қазақстандықтар үшін қолайлылығымен ерекшеленуде. Сондай-ақ, бұл қызметті елімізде оған тілек білдірушілердің барлығы да пайдалана алады. Электронды сандық қолтаңбаны жеделдетіп беру акциясы “Мега-Алматы” және “Мега-Астана” сауда орталықтарында 19 қарашадан бастап, желтоқсан айының 16-сына дейін жалғасады. Төлқұжатты алып келіп, бес минөттің ішінде электронды қолтаңба алуға болады.
Бүгінде “Электронды үкіметтің” www.egov.kz порталында Әділет, Қаржы, Ішкі істер, Еңбек және халықты әлеуметтік қорғау министрліктері мен салық комитетінің алпыс түрлі қызметтері ұсынылған. Ал, олардың ішінде жылжымайтын мүлікке қатысты анықтама, әлеуметтік жеке кодтың көшірмесі, онлайн түрінде салық және айыппұл төлеу сияқты көпшіліктің жоғары сұранысына ие қызметтер бар. “Электронды үкіметтің” http://egov.kz/wps/ portal/EDSR egіstratіon порталына өтініш жіберу арқылы ЭСҚ алуға болады. Жасыратыны жоқ, кез келген қызметте қиындықтар кездесуі әбден мүмкін. Мәселен, электронды сандық қолтаңбаны алу және оны қолдану бойынша қандай да бір түсініспеушілік туындаса, азаматтардың 1414 телефонына қоңырау шалып, “egov” call орталығына хабарласуына болады.
Бақыт БАЛҒАРИНА, Алматы.
Суреттерді түсірген Берсінбек СӘРСЕНОВ.
