56 отбасы бір күнде баспаналы болды

Арқалықтық мазмұндағы пәтерлер 56 отбасы  бір күнде баспаналы болды Арқалық қаласының тұрғыны Болат Жармағанбетов “Өз үйім – өлең төсегім” дегенді дәл өзі се­кіл­­ді баспананың зарын көрген ата­ларымыздың бірі айтқанына  шүбә келтірмейтін.  Құйын жүр­ген­дей еткен  90-шы жылдарғы  ала­сапыран уақыттан кейін Болат пен Батира Жармағанбетовтер бас­панаға жарымады. Шиеттей бес ба­ланы көшіп-қонып,  көрпе-төсе­гін тасып жүріп, жалдаған пәтер­ле­рінде өсірді. Ал бұл қалада иесіз қа­лып, есік-терезесі үңірейіп тұ­ра­тын үйлерден аяқ сүрінетін. Тұр­ғындар үдере көшкенде тұтас ша­ғын аудан қаңырап  бос қалды. Қирату оңай да, оны жинаудың қи­ын екенін арқалықтықтар жақ­сы біледі. Тұралап қалған Арқалық қаласы 2000-шы жылдары бауы­рын қайта көтере бастағанда пәтер кезегі қайта көбейді. Жармаған­бе­товтер де  қала әкімдігіне барып пәтер кезегіне тұрды. Әйтеуір үміт дүниесі,  әйтпесе кезегім биыл келе қояды деген ой Болаттың үш ұйық­таса ойына кірген  жоқ. Үйді  салып ала салатын қаржы жағы тағы тапшы. Сонымен жасы келіп қалған жандар баспананы арман­дап  жүріп жатқан. Жақында қала әкімі Теміржан Төлеубаев тұрғын­дар­ға  жаңа пәтердің кілтін тап­сыр­ғанда бақытты  жандардың қа­тарында Болат та болды. Қуа­ны­шын айтып жеткізе алмайды. Мек­тепте оқып жүрген екі бала­сына сабақ бөлмесі, баспана бол­маған соң Астанаға барып күнін көріп жүрген балалары келгенде жататын қонақ бөлмесі, асхана, жатын бөлме – бәрі бар.Міне, Болат пен Батира мұнан артық кең сарай көрмегендей. Мемлекеттік тұрғын үй бағдар­ла­масы бойынша республика қазынасынан  артық-кемі жоқ 200 миллион теңге бөлінген болатын. Осы үйді тапсырған “Алюмин­строй” ЖШС директоры Абай Мұқановтың айтуынша,  үйдің бір шаршы метрінің өзіндік құны 300  АҚШ доллары болыпты. Қаңқиып қабырғасы ғана қалған  жатақ­ха­наны жертөлесінен бастап, қайта жөндегенде адам танымастай су жаңа үй болып шыға келді. Үйдің асханасы мен ваннасы  кафель, за­манауи санитарлық техника,  кең лоджия,  герметикалық есік-тере­зе­сі де тұрғындардың ойынан шы­ғып тұрды. Сонда үйді салған мердігерге оның құрылысы неге  осыншама арзанға түсті? Өйткені “Алю­ми­н­строй” ЖШС дайын асқа тік қа­сық емес, бюджеттің қаржысын  тисе – терекке, тимесе – бұтақ­қа” деп оңды-солды жарататын мер­дігер емес, кең профильді құ­рылыс мекемесі болып табылады. Олар құрылыс жұмысының сыр­тында жол салады, су құбырларын жүргізеді және  темір-бетон, ас­фальт-бетон бұйымдарын шыға­ра­тын зауыттары, қиыршық тас шы­ғаратын карьері жұмыс істеп тұр. Оның сыртында жиһаз дайын­дай­тын, пластикалық терезе, есік са­ла­тын цехтары және  көлікке, та­сымалға қатысты шаруашылық са­ла­лары да жеткілікті. Білікті бас­шы Абай  Құспанұлы осының бар­лы­ғын да үйдің құрылыс жұ­мыс­та­рына пайдаланғанда, үйдің өзін­дік құны  арзандап шыға келді. Се­ріктестік үйдің су құбырыларын да, жолды да, оның ауласын да, есік-терезесін де өздеріндегі мате­риалмен жасады. Әншейінде тез тап­сырылған үйлерге кіргенде тұр­ғындар қуанарын да, қуанбасын да білмей дал болатын. Себебі, ар­зан­қол материалдардан жасаған үй­лердің кірмей жатып төбесінен су ағып, терезесінен жел улейтін еді. Ал Абай Құспанұлы басқарған мердігерлер құрылысқа қажетті бұйымдарды  негізінен өздері жа­сап, өздері қойғаннан кейін ар­зандығын былай қойғанда, оның сапасы да көңілді орнықтырды. Құрылысшылардың мақтанар­лы­ғын­дай бар, олар Арқалық қала­сында жаңадан бой түзеген үйге тек қазақстандық қана емес, жер­гі­лікті, арқалықтық мазмұн берді. Арқалықта қоныс тойлардың кө­бейе­тініне құрылысшылар да, тұр­ғындар да сенімді. Нәзира ЖӘРІМБЕТОВА, Арқалық. Суретте: Арқалық қаласының әкімі Т.Төлебаев тұрғындарға пәтер кілтін тапсырды.