«Біз қуатты Қазақстан үшін Елбасымен біргеміз!»

БҰЛ – ХАЛЫҚ ТІЛЕГІ

Кеше еліміздің барлық аймақ­та­рында «Нұр Отан» халықтық-демо­кра­тиялық партиясының кең ауқым­ды есептік-сайлау шарасы басталды. Шара бірнеше кезеңді қамтиды. Ең алдымен, партиямыздың негізгі күші – бастауыш партия ұйымдарында ұй­ым­дастырылды. Олардың жалпы са­ны еліміз бойынша 6 мыңнан аса­ды, олар тікелей халықпен жұмыс жа­сай­тындықтан, «Нұр Отан» партиясы бастауыш ұйымға баса назар аударып отыр. Есептік-сайлау жиындары бар­лық бастауыш партия ұйымдарында өтеді. Күн тәртібіндегі мәселелер: жұ­мыс қорытындысы туралы есеп, жа­ңа­дан басшылар сайлау және пар­тияның 2020 жылға дейінгі жаңа бағдар­ламасын талқылау. «Қазақстан темір жолы» ұлттық компаниясы Астана локомотив депосында өткен жи­ынға партия Төрағасының бірінші орын­басары Нұрлан Нығматулин қатысты. Сондай-ақ, нұротандықтар шы­ғыс­қазақстандықтардың еліміздің тұң­ғыш Президенті өкілдігін ұзарту жө­нінде референдум өткізу туралы бас­тамасын назардан тыс қалдыр­ма­ды. Сондықтан болар, жиын бар­ы­сында осы мәселе ерекше талқыға түсті. Партиялықтар референдум өт­кізу мәселесін толық қолдай­тын­дықтарын білдірді. Нұрлан Нығматулин тек Қазақ­стан Көшбасшысы тұлғасы еліміздің болашақ дамуындағы негізгі фактор екеніне сенімді. «Береке мен бірлік, бейбіт өмір мен ұрпақтың жарқын болашағы – ол бүгін Қазақстаны­мыз­дың ең үлкен жетістігі. Ал осының барлығы Президентіміздің туған еліне жасап жатқан ерен еңбегінің жемісі. Сондықтан Елбасымыз Нұрсұлтан Әбішұлы Назарбаевтың мемлекетімізді алдағы уақытта да басқаруы туралы шешім қабылданса, меніңше, ол – тікелей халықтың тілегі екені сөзсіз», – деп атап өтті партия Төрағасының бірінші орынбасары. Дәл осындай қолдау «Нұр Отанның» барлық бастауыш партия ұйымдарында айтылды. Есептік-сайлау шарасы 25 қаңтарға дейін жалғасады.

«Егемен-ақпарат».

* * *

ӨМІРІМ ДЕ, ӨРІСІМ ДЕ – ӨНЕР

Туған халқың туың қадар тұғырың болған­дық­тан, осы алтын бесікке басымды иіп, тағзым етуден еш талған емеспін. Қара ормандай қалың Қа­зақ еліне Сұлтанмахмұт ақын жырлағандай, әр перзенті: «Қараңғы қазақ көгіне, Өрмелеп шығып күн болам. Қараңғылықтың кегіне Күн болмағанда кім болам» деп Отан үшін от­қа түсуге даяр тұрса, ел мен жердің көркейіп гүл­денуі ең алдымен, адамдарына байланысты болып көрінеді маған. Елім деп еміренген ерке үн ескерусіз қалмайды екен. Ел-жұртымның бүгін маған көрсеткен осыншалық қошеметіне мерейім өсіп, көңілдің жас балаша толқуын қарасайшы. Елінің ерке қызы Роза Бағланова апамыз сөз бастарда әр­дайым халқына ризашылығын білдіріп, алғысын жаудырып алатын. Шаттық күйіне бөленген менің де әуелі туған халқыма рахметімді айтып алу па­ры­зым секілді. Және мемлекеттің ең жоғарғы наг­радасын ел Президенті Нұрсұлтан Назарбаев өз қолымен кеудеме қадап беріп жатса, өнер адамына мұнан асқан тағы қандай бақыт керек? Бағым – халқым. Дәулетім – өнерім. Осы екеуі дін аман бол­са, менің де кеудемнен кәусар саз үздіксіз сың­ғыр­лап тұрар, ел мен жердің киесіне кіршіксіз сезіммен толғата саз төгілер, өмір-ағыс алға қол создыра берер. Туған жерге бергенім аз болма­ған­мен, әлі де алтын сандық түбінде асыл маржан аз көрінбейді. Өйткені, шығармашылық адамының табиғаты осылай жаратылған. Жаныған сайын жар­қырай түседі олар. Болдым, толдым деп шал­қаю жоқ бұларда. Ел-жұртым төбесіне көтеріп, марапаттап жатқанда жан дүниең жайбарақат жата ма? Бұл да болса Мәшһүр Жүсіп бабамыз айтпақшы: «Өмірде көп жасағандықтан көрген бір тамашамыз» секілді тірліктің салған өрнегі ғой. Дүниенің түрлі еліндегі болып жатқан небір сойқан нәрселерді көріп, түршігіп, бүгінгі ел-жұр­тым­ның алға басқан тірлігіне, ынтымақ-бірлігіне іштей жаным сүйсінеді. Ел басқарып отырған аза­маттарды Құдай аман қылсын деген тілекті іштей қайталаудан жалықпаймын қайда жүрсем де. Шәкәрім атындағы Семей университетінің ректо­ры, Ерлан Сыдық деген азамат Елбасының президенттік мерзімін 2020 жылға дейін ұзарту керек деп жұртқа ой тастап жатқанын теледидардан көр­іп қалдым. Оның сөзін дұрыс деп қоштап, Олжас ақын айтып жатыр. Осының бәрі жай нәрсе емес. Елдің тыныштығына, Қазақ елінің келешегіне мем­лекет басында Нұрсұлтан Назарбаев сынды бүкіл әлем мойындаған адам отырса, Қазақ­стан­ның болашағы жарқын болады деген сөз. Мен мұндай ұсынысты толығымен қоштаймын. Ал менің қуанышыма ортақтасып, наградама құттықтаулар жолдаған барша жұртқа шын жү­рек­тен ризашылығымды білдіргім келеді. Барлық облыстың әкімдеріне рахмет. Жеке келіп құт­тық­таған еліміздің Бас прокуроры Қайрат Мәмиге мың да бір алғыс. Бір кездері өзім білім алған, одан кейін біраз жылдар басшы болып қызмет істеген алтын ұям – Алматыдағы Құрманғазы атын­дағы консерваторияны, аяулы шәкіртім Айман Мұсақожаева басқаратын Ұлттық өнер университетін, өзім оқыған музыкалық колледжді ерекше атап өткім келеді. Аягөз бен Үржардағы, (Шығыс Қа­зақстан облысы), сосын Капланбектегі (Оң­түс­тік Қазақстан облысы) менің есіміммен аталатын мектеп ұжымдарынан келген құттықтаулардың жө­ні өз алдына бір төбе, әрине.  Қуанышты бө­ліссең, көбейеді демекші, әлі күнге дейін жылы лебіз тасқыны толастар емес. Халқыммен қауыш­ты­рып, іштегі сырымды ағыл-тегіл ақтарып оты­ра­тын бас басылым – «Егемен Қазақстан» газетіне алғысым бар айтатын. Жалпы, осынау қуа­ны­шыма ортақтасып, тілегін аямаған әлеуметтің әмбесіне нұры жаусын Алланың. Осыған қоса жа­қын­да ТМД-ға мүше елдердің Парламент­аралық ассамблеясы, «Древо жизни» қоры мен Ресей Федерациясы кеңесінің қолдауымен «Арт-ассам­блея» продюсерлік орталығының ғылым, өнер, мәдениет, саясат, спорт саласындағы жемісті шы­ғар­машылық еңбегі үшін тағайындаған халық­ара­лық «Древо жизни» сыйлығына ие болған атағым тағы бар. Қазақстаннан Жабайхан Әбділдин екеумізге мұны кеңестің төрағасы Сергей Миронов та­быстады. Өзге елдер де өнерімді қадірлеуде. Мұны жалпы, қазақ өнеріне көрсетілген құрмет деп білемін. Бәрін айт та, бірін айт, жақсы­лық­тары­ма жаны қалмай қуанып, қуанышымды бө­ліс­кен барлық жәмиғатқа ақ, адал тілектеріңіз үшін басымды иіп, алғыс білдіремін.

Еркеғали РАХМАДИЕВ, Қазақстанның Еңбек Ері.

* * *

ӨЗІ БАСТАҒАН РЕФОРМАЛАРДЫ ӨЗІ АЯҚТАҒАНЫ ОРЫНДЫ

Республиканың қатардағы аза­маты ретінде мен Қазақстанның тәуелсіздік жылдарындағы жаң­ғы­рулары мен жетістіктерін ай­қын көріп келемін. Және біздің бар­лық табыстарымыздың бүтін­дей және толықтай Қазақстанның Тұңғыш Президенті Нұрсұлтан Әбішұлы Назарбаевтың қажырлы еңбегі мен басшылығының арқа­сы екенін нақты білемін. Жергілікті ұлттың өкілі болып табылмайтын мен үшін Мемлекет басшысы құрған Қазақстан халқы Ассамблеясы сияқты институт өте маңызды. Этносаралық қарым-қа­ты­настарды реттеудегі біздің елі­міз­дің оң тәжірибесі бүгінде  лидерлері мен мемлекет қайрат­кер­лері Н.Ә.Назарбаевты ұлтаралық және конфессияаралық келісімнің қазақстандық моделінің негізін қалаушы деп орынды санайтын әлемнің көптеген елдері үшін үлгі болып әрі зерттеу нысанына айналып отыр. Екі онжылдық қана өткен қыс­қа мерзімде Қазақстан әлемде та­нымал елге айналды. Түрлі ұлттар өкілдерінің арасындағы бейбіт өмірді, келісім мен достықты мем­лекеттіліктің негізіне қалай оты­рып, біздің еліміз алға қойған мақ­саттарға қол жеткізу жолында сенімді алға басуда. Бүгінде Қа­зақстан — бұл әлеуметтік-эконо­ми­калық дамудың айқын стра­те­гиясы мен нақты перспектива­ларына ие әлемдік қоғамдастықта кең танылған мемлекет. Қазақстанға ЕҚЫҰ төраға­лы­ғын жүктеудің өзі де біздің Пре­зи­дентімізге, жас респуб­ли­камызға әлемнің жетекші елдерінің көр­сеткен жоғары сенімінің тағы бір айғағы. Әлемдік державалар ли­дерлерінің Астанаға ЕҚЫҰ Саммитіне келуі — мойындалған Лидер және Адам ретіндегі Нұр­сұл­тан Назарбаевқа деген ең жоғары құрметтің белгісі. Бірақ мен үшін ең бастысы — ол Мемлекет басшысының жоға­ры адамгершілік қасиеті. Оның терең өнегелілігі, біздің өмірімізді жақсартуға деген шынайы ұмты­лысы, әңгімелесушіні тыңдай және оған жанашырлық таныта білуі. Президенттің өмірге құш­тарлығы мен сенімділігі өзгені де баурап алады, ондай адамның қа­сында өзіңді қорғанышты сезі­не­сің. Батысқазақстандықтар оның бүкіл бастамалары мен реформа­ларын қолдай отырып, ел Президентіне шынайы құрметпен және түсіністікпен қарайды дегенді сеніммен айта аламын. Өзіңнің бүкіл ұшқары әрі жеке мүддедегі ойларыңды ысырып тас­тап, Қазақстан Республикасы­ның барлық халқына қатысы бар принципті шешім қабылдайтын сәт туады. Ел Президенті бастаған бүкіл экономикалық және саяси реформалардың тағдыры шешілетін дәл қазіргідей сәтте ол ре­формаларды Нұрсұлтан Әбішұлы Назарбаевтың өзінің соңына дейін жеткізгені қисынды болар еді.

Сергей ПОГОДИН, Орал қаласындағы Орыс орталығы қоғамдық бірлестігінің төрағасы, Қазақстан халқы Ассамблеясының мүшесі.

* * *

ХАЛЫҚ ҚАЛАҒАН КӨШБАСШЫ

Еліміздің Тұңғыш Президенті – Елбасы Нұрсұлтан Назарбаевтың өкілеттігін 2020 жылғы желтоқсанға дейін ұзарту мақса­тын­да бүкілхалықтық референдум өткізу жө­нін­дегі республикалық ынталы топтың ұсы­нысын Жамбыл облысы жұртшылығы қызу қолдап отыр. Шығыс Қазақстан облысының ынталы тобы ұйымдастырған жиынғы қатысып, олардың бас­та­маларын қолдап қайтқан қоғамдық ұйымдар мен ұлттық-мәдени орталықтардың жетекшілері бұрнағы күні облыс тұрғындарының өкіл­дері­мен кездесті. Тараз мемлекеттік университетінде өткен осы жиында еңбек ардагері, саясат­танушы Әлмұхан Исақ Мемлекет басшысының ел экономикасын дамытып, сонымен бірге бейбітшілік пен тұрақтылықты қамтамасыз етіп отырған сарабдал саясаты арқасында әлем ал­дындағы беделі жылдан-жылға өсіп келе жатқанына ерекше тоқталды. – Ұлт Көшбасшысы – Тұңғыш Президен­ті­міз­дің салиқалы саясатының арқасында елдің эко­номикалық жағдайы түзелді, қазақстан­дық­тар­дың тұрмыс деңгейі көтерілді. Соның арқа­сын­да Президент халық жүрегінен орын алды. Дәл қазір оған балама жоқ. Ал мұндай жағ­дай­да сайлауды күтіп, сарылып отырудың не қажеті бар? Сондықтан, мен еліміздің Тұңғыш Президенті – Елбасы Нұрсұлтан Назарбаевтың өкілеттігін 2020 жылғы желтоқсанға дейін ұзарту мақсатында бүкілхалықтық референдум өткізу жөніндегі республикалық ынталы топтың ұсынысын өте дұрыс бастама деп санап, оны қолдауға шақырамын. Ел халқы бұл саяси қадамнан ұтпаса, ұтылмайды. Өйткені, қарапайым халық референдум арқылы уақытын да, қажыр-қайратын да үнемдейді. Бастамашыл топтың өзім естіп келген ұсынысын бір ауыздан қолдап отырған Шығыс Қазақстан жұртшылығы өкілдерінің дәйегі де осыған келіп тіреледі. Бұл бастаманы жамбылдықтардың да бір адамдай қолдайтынына күмән келтірмеймін, – деді ол. Өскеменде өткен жиынға қатысып келген жамбылдық азаматтар мен азаматшалар да өз пікірлерін ортаға салып, украин, ұй­ғыр ұлттық-мәдени орталықтарының жетекшілері Ф.Клименко, М.Тұрдиева, облыстық мәс­лихаттың де­пу­таты, кәсіподақтардың облыстық кеңесінің төрайымы Г.Орынбаева, Тараз мемлекеттік универ­ситетінің ректоры Ә.Ахметов жи­нал­ған жұртшылықты Елбасы Нұрсұлтан На­зар­баевтың өкілеттігін 2020 жылғы желтоқсанға дейін ұзарту мақсатында бүкілхалықтық референдум өткізу жөніндегі бастамашылар тобы­ның Үндеуін бір ауыздан қолдауға шақырды.

Көсемәлі СӘТТІБАЙҰЛЫ.

Жамбыл облысы.