Көңіл көкте шалқыған сәт

Атырауда сәулетті мектеп, еңселі емхана, жайлы баспана пайдалануға берілді Адам өмірінде қуанышсыз күннің болмауы мүмкін емес. Әрине, қуанышты сәттердің кей­де елене бермейтіні бар. Дегенмен, тұтас бір ауылдың, бір қаланың өмірінде жұртшы­лық­ты елең еткізер сәулетті мектеп пен еңселі емхана ашылып, бір күнде 135 отбасына баспана ба­қы­ты бұйырып тұрса ше? Осы қуа­ныштың бәрі бір күнде, Жаңа жыл қарсаңында болуы жұр­тшылықтың мерейін алабө­тен тасытып жіберді. Бір ауылдың дейтініміз, соң­ғы жылдары Атырау қаласының іргесіне таяу қоныстанған елді мекендер қатары көбейді. Сондай ауылдың бірі – Жұмыскер. Бұл бұрыннан бар ауыл еді. Енді осы ауылдан жеке баспана салу үшін жер телімдері берілуімен тұрғындар саны екі еселеніп көбейді. Сол себептен осын­дағы бұрынғы мектептің тар­лы­ғы байқалды, оған қоса ауыл­дың бір шетінен балалардың білім ордасына қатынау қиын­ды­ғын туғызған еді. Осыны ескерген жергілікті басшылар Жұ­мыс­керге жаңа мектеп қажет деп тапты. Сөйтіп, Елбасының “100 мектеп, 100 аурухана ” бағ­дарламасы аясында бір мезгілде 624 оқушыға білім беретін жаңа мектеп құрылысы бастау алды. Бір ерекшелігі, бұл қатар­да­ғы мектеп емес. 1 сыныптан ағылшын тілін тереңдетіп оқы­татын мектеп-гимназияның өзге білім ұяларынан артықшылығы көбірек. Әзірге 35-ші рет саны ғана берілген мектеп-гимназия директоры Алмабек Қабдо­лов­тың айтуынша, біріншіден, білім ұясы 3 лингафон, компьютер, технология және стоматология кабинеттері қажетті жаб­дықтармен толық қамтылған. Технология дәрісі өтетін шеберханада әсем киім үлгілерін тігетін шебер тігіншілердің түсіне кірмеген осы заманғы тігін мәшинелері қойылған. Екіншіден, мұнда екі спорт залы және ауладағы алаң бар. Бұл дене тәрбиесі пәнін бір мезгілде бірнеше сыныпта өткізуге өте қо­лайлы. Бұлардан өзге музыка пә­нін өткізуге толық мүмкіндік барлығы байқалады. Музыка пәнінің мұғалімі Сандуғаш Діл­мұқанованың айтуынша, оқу­шы­лардың саз аспаптарына қы­зы­ғушылығын оятатындай жаңа саз аспаптары алыныпты. Мектеп-гимназия оқушылары енді сабақ басталар алдында “Қара­жор­ға” биін билеп, бой сергітіп алады. Ал екі сабақтан кейінгі 10 минөттік үзілісте қазақтың күйлері мен термелері ұдайы беріліп тұрады. – Таяудағы жылдарда Аты­рау­да мектептің жетіспеушілігі дейтін мәселе толығымен шешіледі. Соның дәлелі болатындай жаңа білім ұясының бірі бүгін оқушыларға есік ашты, – деді облыс әкімі Бергей Рысқалиев №35 мектеп-гимназияның ашы­лу салта­натында. – Мұғалім­дер­ге әлеуметтік қолдау көр­се­тіле береді. Әсіресе, жоғары оқу орнын бітірген жас маман­дар­ды баспанамен қамту толық шешімін табады. Атырауда тек білім ұялары ғана емес, медицина орындары да жетіспейді. Ауылдарды айт­па­ғанның өзінде Атырау қала­сының өзінде типтік жобаға сәй­кес келмейтін ғимаратқа орын тепкен медицина меке­ме­сінің бірі – қалалық балалар емханасы. Осы кезге дейін орналасқан ғимараты бала­бақ­ша­ға көбірек ұқсайтын еді. Сыр­қат балаларын дәрігерге көр­сетуге әкелген ата-аналар­дың тар дәлізде кезек күткен­де­гі тауқыметін айтып жеткізу қиын болатын. Енді балалар ем­ханасының ұжымы жаңа ғи­маратқа қоныс аударды. Ем­ха­на­ның бас дәрігері Е. Топиль­ская­ның айтуынша, бала­лардың сырқатын анықтауға қа­жетті медициналық жабдық­тар­дың барлығы орнатылған деуге болады. Эндоскопия, эндо­кри­нология бөлмелері мен уль­тра­ды­быстық зертхананың меди­ци­налық құрылғыларын айт­па­ған­да, ем алушы балаларға ар­нал­ған ойын кабинеті де жаб­дықталған. – Бұрын бізде травмо­то­ло­гиялық пункт болған емес. Оған ескі ғимаратымыз тар­лық етті. Енді жаңа ғимаратта сондай бөлім ашуға толық мүмкіндік бар. Күндізгі емдеу бөлімі де ашылып отыр. Осы жаңа ғимараттың ашылуымен енді 65 мың баланың сау­лы­ғын қорғай­тын іргелі ұжымға айналдық, – дейді Е.Топильская. Оның ай­туын­ша, алдағы уақытта емха­на­ны кадрлармен қамту мәсе­ле­сі шешілетінге ұқ­сайды. Әзірге балалар емха­насындағы жоғары білімді дәрігерлермен қамты­луы 83 пай­ызды, ал орта бу­ын­ды медицина қызметкерлерінің үле­сі 90 пайызды құрайды екен. “Нұрсая” – соңғы екі-үш жылда бой көтерген шағын аудан. Мұнда былтыр да жаңа тұрғын үйлер тапсырылған. Жаңа тұрғын үйлер қатары тағы да толықты. Бір күнде қаланың 135 тұрғыны жайлы баспана­ның кілтіне ие болып, мәре-сәре қуанып жатты. Қа­лалық тұрғын үй секторының меңгерушісі Дінмұхамбет Бар­босыновтың айтуынша, бұл жолы жалдық пәтерлермен мұғалімдер мен дәрігерлер, баспана кезегінде ұзақ жыл тұрғандар алдымен қамтыл­ған. Және бір қуаныш­тысы – жаңа тұрғын үйден об­лыстық газеттер мен “Қазақ­стан” ТРК-нің өңірлік фи­ли­алындағы әріп­тестеріміздің пәтер алуы. Жолдасбек ШӨПЕҒҰЛ. Атырау облысы.