Қатарынан төртінші жеңіс

Бұрнағы күні Құрлықтық хоккей лигасы шеңберінде Астананың «Барысы» өз айдынында Екатеринбургтің «Автомобилист» командасын қабылдады. Тартысты өткен ойын нәтижесінде біздің жасақ 4:3 есебімен жеңіске жетіп, үш ұпайды қоржынға салды. Андрей Назаровтың шәкірт­тері кездесуді өте ширақ бастады. Салған жерден алға ұмтылған айдын иелерін қонақтар ойын ережесін бұзу арқылы ғана тоқтата алды. Нәтижесінде 3 және 4-минуттарда «Автомобилистің» екі бірдей ойыншысы айдыннан қуылды. Алайда, «Барыс» хоккейшілері үш қорғаушымен қалған ресейліктердің осал тұсын таба алмады. Есесіне, 8-минутта қонақтар ойыншы басымдығын жүзеге асырып, Виталий Поповтың көмегімен есеп ашты. Үзіліске 6 минут қалғанда «Автомобилист» сапы­нан Анатолий Голышев мер­ген­ді­гімен көзге түсіп, есепті еселеді. Екінші кезең тағы да «Барыс­тың» басымдығымен басталды. Бұл жолы жүйелі ойын өрне­гін көрсеткен астаналықтар бір ми­нуттың ішінде екі шайба соғып, таразы басын теңестіріп кетті. Атап айтқанда, 22-минутта Кевин Даллмэн нәтижелі соққы жасаса, 23-минутта Роман Старченконың мерейі үстем болды. Ойынның соңғы кезеңінде, яғни, 42-минутта Петр Коукал біздің қақпадан саңылау тауы­п, қонақтар тағы да алға шықты. Әйтсе де, сағы сынбаған барыс­тықтар шабуылдарын тоқтатпады. Бұл тактика өз же­місін беріп, Дастин Бойд 50-минутта есепті 3:3-ке жеткізсе, 54-минутта «Барыстың» капитаны Брэндон Боченски жеңіс шайбасының авторы атанды. Осылайша, «Барыс» плей-офф жолдамасына таластағы басты қарсыластың бірі «Авто­мобилистен» үш ұпай олжалады. Бүгінде 48 ойыннан 69 ұпай жиған елордалық ұжым Шығыс конференциясында 7-орында келеді. Ал 64 ұпайы бар Екатеринбургтің командасы – 9-орында. Дегенмен, оның «Барыстан» үш ойын кем өткізгенін атап өткен жөн. Біздің команда келесі кезде­суін 11 қаңтар күні Тольяттиде жергілікті «Ладамен» өткізеді. Еламан ҚОҢЫР, «Егемен Қазақстан».