Қарағандыда ұрылар мейрамхананы тонап кетті

ҚАРАҒАНДЫ. 11 қаңтар. Қарағанды облысындағы Шахтинск қаласында аса танымал мейрамхана тоналды. Бұл туралы облыстық ішкі істер департаментінің баспасөз қызметіне сілтеме жасаған egemen.kz тілшісі хабарлады. Сағат таңғы бесте бетперде киген төрт адам күзетші әйел мен кондитер келіншекті қарумен қорқытып, мейрамхана директорының кабинетіне енеді. Содан кейін, олар совет замананынан қалған ескі сейфтің есігін оп-оңай бұзып, ішіндегі 46 миллион теңгені түгелдей үптеп кеткен. Тәртіп сақшылары үшін бұл қылмысты ашу оңайға түсейін деп тұрған жоқ. Өйткені, қарақшылардың барлығы да бірдей қара түсті киім киген және беттері де жабық болған. Оның үстіне олар бір де бір жерге саусақ таңбасын қалдырмапты. Қазіргі таңда іздестіру жұмыстары жалғасуда. Қайрат Әбілдинов. Дерек, сурет: egemen.kz.