«Ел» сөзінде үлкен біріктірушілік күш бар

«5 институттық реформаны жүзеге асыру бойынша 100 нақты қадам» Ұлт Жоспарында ел мен қоғамды дамытудың басты басымдықтары атап көрсетілді. Елбасы тарихымыздағы бұрын-соңды болмаған ауқымдағы ұлт­тық заңнамаға өзгерістерді бағамдау маңыздылығын алға тарта отырып, ХХІ ғасырда көш­бас­шы отыз елдің бірі болуға қол жеткі­зуімізге жол ашып отыр. Бүгінде барша қазақстандықтар үшін Тәуелсіздіктен асқан құндылық жоқ. Ата-бабаларымыз ғасырлар бойы аңсаған арманымыз орындалып, Қазақстанды Отаным, қар­а­шаңырағым деп есептейтін, бойындағы күш-жігері мен сүйіс­пеншілігін тұтас халықтың мақсат-мүддесіне арнаған көпэт­носты қоғамымыздың берік тіні – бірлік, ынтымақ. Ширек ғасыр бедерінде жаңа технологиялар өндірістің барлық буындарына енгізіліп, инвестициялар тартуға қолайлы мүмкіндіктер туғызылды. Бәсекеге қабілеттілік қарымын арттыру мақсатымен ин­дустриялық-инновациялық да­мудың ауқымды кешенді бағ­дарламасы қабылданды. Нәти­жесінде экономиканың нақты табыстары өсіп, ұлттық байлығымыз бен қауіпсіздігіміз сенімді түрде қамтамасыз етілді. Бүгінгі көрсеткіш ертеңге меже емес. Осы тұрғыдан алғанда, Мемлекет басшысы Ұлт Жоспарын орындаудың практикалық кезеңі басталғанын жария ете отырып, бес институттық реформаны ойдағыдай орындауға жұмылдырудың серпінді қа­дам­дары мемлекеттік биліктің өкілетті, атқарушы тармақтарына баса жүктелді. Қаржылық дағдарыстың күшті ықпалын сезініп отырған қазіргі кезеңде экономикалық және азаматтық белсенділіктердің барлық тетіктерін іске қосудың мәні зор. Сол себепті бірінші реформа мемлекеттік аппараттың тиімділігін арттыруға бағытталып, бірқатар заңнамалық актілер қабылданды. Мемлекеттік қызмет­шілердің жаңа кадрлық корпу­сын конкурс және мерито­кра­тия қағидаттары арқылы қалыптастырып, тек мемлекеттік жүйе ғана емес, сондай-ақ, жем­қорлыққа қарсы іс-қимыл танытатын, алдын алуға бағдарланған жүйе жаңғыртылады. Осылайша, мем­лекеттік қызметтің жаңар­тылған моделі негізінде адам­дардың ой-санасында қоғамды жегі құрттай жеген мерезді ауыз­дықтауға болады деген берік сенім орнығады. Кейбіреулер заң осал деп жатады. Тәжірибеге сүйенсек, мүлдем олай емес. Мәселе, қол­даныстағы заң актілерінің толық күшінде пайдаланылмауында. Енді мансаптық сатының әр баспалдағында мемлекеттік қыз­метші кәсіби жарамдылығын дә­лелдесе ғана қызметі өрге баса алады. Мемлекеттік қызметке орналасуда қағидатты нормалар басшылыққа алынып, мүлтіксіз орындалатын болады. Сонымен қатар, еңбекақы төлеудің жаңа жүйесі біліктілік пен атқаратын жұмыс сипатына, көлемі мен нә­ти­жесіне байланысты заңдық тұрғы­дан бе­куі, аса нәтижелі қызмет үшін бо­нустар төлеу қарасты­ры­луы кадр саясаты саласындағы жаң­ғыр­тулар болып табылатыны анық. Екінші реформа бойынша азамат­тардың құқықтары мен бос­тан­дықтарын қамтамасыз етуде құқық тәртібін нығайтуға, заңдар­ды орындау тәртібін қатаңдатуға ерекше басымдықтар берілген. Оның ішінде сапалы судьялар корпусын құру көзделген. Қара­пайым жұртшылық үшін сот төрелігінің бес сатылы жүйесінен үш буынды жүйесіне көшудің тиімді жақтары көп. Ең бастысы, талапкерлердің әуре-сарсаңы азаяды, жергілікті инстанциялық соттардың жауапкершілігі мен рөлі күшейтіледі. Өзгелер тарапынан судьяларға қабылдайтын шешімдерге ықпал ету мүмкіндігі барынша азайтылып, адамдардың әділ сотқа деген сенімі күшейеді. Реформалар табысы ұлт бір­лігіне бастайтын бірден-бір жол екенін Елбасы айрықша атап көр­сетті. Әлемнің дамыған мемле­кеттері осы үрдісті бағдар етеді. Бірыңғай экономикалық, саяси, мәдени тәртіппен өмір сү­реді. Жеке адам мен қоғамның бірлігі ажырағысыз. Қазақстан да осы жолмен келеді. Қазақстан­дықтардың азаматтық біртектілігі мен біртұтастығын нығайтуға бағытталған төртінші рефоманың мәні бірлік жолын дәйектілікпен қалыптастыру болып табылады. «Ел» сөзінде үлкен біріктірушілік күш барын, барлық уақыттарда да туған жер қазақстандықтар үшін ең жақын және өзіне тартушы құндылық болып қала беретінін айтудан Елбасы жалыққан емес. Өйткені, Мәңгілік Ел идеясының түп-төркінінде болашаққа деген жалпыхалықтық сенім күші жатыр. Облыстың дамуына нақты үлестерін қосып келе жатқан ха­лық қалаулылары Мемлекет басшысы қандай асқаралы міндеттер жүктеп отырғанын жақсы түсінеді. Бүгінгі таңда депутаттардың 60 пайызы ауыл шаруашылығы қызметкерлерінің өкілдері. Олар­дың арасында “Зенченко және К” КС директоры Г. Зенченко, “Ба­бық Бұрлық” ЖШС-нің басшысы С.Махметов, “Якорь” ЖШС-нің жетекшісі В.Очеретенко, тағы басқалары өздерінің әлеумет­тік міндеттемелеріне адал. Тұрақ­ты комиссиялар мүшелері қабыл­данған бағдарламалардың орындалуын жүйелі бақылап отырады. Көшпелі отырыстарда жұрт­шылықты толғандырған көкей­кесті мәселелердің шешімі назардан тыс қалмайды. 2015-2017 жылдарға арналған облыстық бюджетке төрт рет өзгерістер мен толықтырулар енгізіліп, қосымша қаражат әлеуметтік салаларға тартылды. Тұрғындармен тұрақты жұмыс жүргізу депутаттық қыз­меттің бір бағыты деуге болады. Осы орайда К. Мұсырман, Ә.Шө­кенов, Қ.Бишімов, С.Леон­тьев, Г.Илдырымов, П.Мела­шенко сияқты депутаттар сайлау­шы­лар аманаттарын абырой­мен арқалап жүр. Олардың әр ісі сайлаушылардың мұң-мұқ­таждарын шешуге, қайырымдылық көмек көрсетуге, өткізіліп жатқан акцияларға қатысуға бағытталған. Ұлт Жоспарында жергілікті өзін-өзі басқару жүйесін нығайту, селолық округтер негізінде әкім­шілік-аумақтық бірлікті күшей­ту жолдары қарастырылған. Бұл іске барлық деңгейдегі халық қа­лау­лылары белсене қатыс­тыры­лып, өкілеттілігі күшейтілері сөзсіз. Елбасы Н. Назарбаев өз ма­қала­сында ел дамуының ұзақ жыл­дарға арналған басты қағи­дат­тарын белгілеп берді. Халық қалаулыларының міндеті – оның тиімді орындалуына өз үлестерін қосу. Қайырлы ЕДІРЕСОВ, облыстық мәслихаттың хатшысы. Солтүстік Қазақстан облысы.