Қырғыз жаттықтырушылары Петропавлға келді

ПЕТРОПАВЛ. 19 қаңтар. Бауырлас қырғыз елінің бір топ жаттықтырушылары Қызылжар өңірінде 3 күндік жұмыс сапармен болып, бірқатар спорт нысандарын аралады. Бұл туралы egemen тілшісі хабарлады. «Спорттың бұқаралылығын жандандыруда Қазақстанның бізден көш ілгері кеткенін мойындауға тура келеді. Сіздерде де спорттың материалдық-техникалық базасы жақсы дамығанын көрдік. Нарында үш қана күрес залы жұмыс істейді»,–дейді еркін күрестен жаттықтырушы Суйунбек Бошубеков. Делегация құрамындағы 8 жаттықтырушы спорт сарайында, басқа да ғимараттарда болып, іс-тәжірибелер алмасты. Футбол, дзюдо, хоккей, бокс, тағы басқа үйірмелердегі балғындардың жаттығу жұмыстарын тамашалады. Нарын облыстық спортты қолдау және дамыту қорының төрағасы Эльзар Болотбековтың айтуынша, тәжірибе алмасу сапары екі жаққа да тиімді болмақ. Өмір Есқали. Дерек: egemen.kz. Сурет: iktu.kz.