Әлемдегі 70 ел

ресми түрде ЭКСПО-2017 көрмесіне қатысатындығын растады Сыртқы істер министрінің бірінші орынбасары, ЭКСПО-2017 көрмесінің комиссары Рәпіл Жошыбаев Латвия Республикасының Қазақстандағы Төтенше және өкілетті елшісі Юрийс Погребнякспен кездесті. Тараптар «жасыл энергетика» саласында одан әрі ынтымақ­тасудың келешегі жөнінде пікір алмасып, Латвияның Ас­тана көрмесіне қатысуының мәсе­лелерін талқылады. Р.Жошыбаев Қазақстанның көрмеге дайындық шеңберіндегі атқарылып жатқан жұмысы туралы хабарлап, латвиялық тараптың ЭКСПО-2017 көрмесіне қа­тысуы Қазақстан мен Латвия арасындағы ынтымақтастыққа жаңа серпін беретінін атап өтті. Өзі тарапынан Ю.Погребнякс Латвия үкіметінің ЭКСПО-2017 көрмесіне ресми түрде қаты­сатындығын растайтын нотаны табыстады. Оның айтуынша, Латвия Халық­аралық көрме бюросына мүше емес елдердің қатарында және бірнеше рет ЭКСПО көрмесінің қатысушысы болған. ЭКСПО-2017 көрмесіне қатысуын растауы Латвияның Қазақстанға деген жоғары қызығушылығын және ерекше достық қатынастарын көрсетеді. Латвия 2020 жылға дейін ең «жасыл» мемлекет болуға ұмтылыс жасап отырған елдердің бірі және кездесу барысында Қазақстанмен «жасыл энергетика» саласында ынтымақтасуға дайын екенін білдірді. Латвия Қазақстан Прези­денті Нұрсұлтан Назарбаевтың «Жасыл көпір» бағдарламасын даярлау бастамасын қолдаған алғашқы мемлекеттердің бірі және осы бағдарлама бойынша Хартияға қол қойды. Сонымен, бүгінгі күні Латвия 70-ші мемлекет болып ресми түрде ЭКСПО-2017 көр­месіне қатысатындығын растады.  «Егемен-ақпарат».