• 23 Қаңтар, 2016

Құқықтық дәрістеме өткізілді

258 рет

көрсетілді

1 мин

оқу үшін

Egemen Qazaqstan

Ақмола облыстық әділет департаменті Мағжан Жұмабаев атындағы облыстық ғылыми әмбебап кітапханасымен бірлесіп, Қазақстан Республикасы Президентінің «Қазақстан жаңа жаһандық нақты ахуалда: өсім, реформалар, даму» атты Жолдауы бойынша құқықтық дәрістеме өткізді. Шара барысында әділет департаментінің атқару өндірісін қамтамасыз ету басқармасының басшысы Манар Байғожина Жанайдар Мусин атындағы Көкшетау қазақ педагогикалық колледжі мен гуманитарлық-техникалық лицей шәкірттеріне Елбасы Нұрсұлтан Назарбаевтың «100 нақты қадам» Ұлт Жоспары мен 2015 жылдың 30 қарашасында халыққа арнаған «Қазақстан жаңа жаһандық нақты ахуалда: өсім, реформалар, даму» Жолдауын кеңінен түсіндіріп өтті. Сонымен қатар, елімізде осы жоспарды іске асыру мақсатында бірқатар жаңа заңдардың қабылданғанына, жыл аяғына дейін тағы басқа да заңнамалық актілерге өзгерістер енгізу көзделіп отырғанына тоқталды. Пікір алмасу кезінде Жанайдар Мусин атындағы Көкшетау қазақ педагогикалық колледжінің оқушылары Фариза Еншілес пен Лашын Аманбек 2017 жылдан бастап жастардың тегін кәсіптік білім алатынына, жас буынның жұмысшы мамандықтарын меңгеруі қажеттігіне қолдау білдіріп, өздерінің болашақ туралы ойларын ортаға салды. Оқу орнында сайлауға дайындық шарасы барысында тұңғыш дауыс берушілер тізімі әзірленгені, оларға зор жауапкершілік артылатыны да айтылды. Облыстық кітапхана жанынан құрылған «Серпер» клубының төрағасы Бақытберді Қуатхан замандастарын Жолдаудағы міндеттерді бірлесіп жүзеге асыруға белсене араласуға шақырса, кітапхана қызметкерлері дайындаған «Қазақстан жаңа жаһандық нақты ахуалда: өсім, реформалар, даму» көрмесінен де көпшілк келелі ой түйді. Бақберген АМАЛБЕК, «Егемен Қазақстан». Ақмола облысы.