Давоста қол жеткен келісім

Швейцария Астанада өткізілетін Халықаралық маман­дандырылған ЭКСПО-2017 көрмесіне қатысу келісімшартына ресми түрде қол қойды. Бұл туралы Давос қаласында жыл сайынғы өткізілетін Бүкіләлемдік экономикалық форум аясында белгілі болды. Келісімшартқа «Астана ЭКСПО-2017» ұлттық компания­сы» АҚ-тың басқарма төрағасы Ахметжан Есімов пен Швейцария Конфедерациясының секция комиссары Мануэль Салхи қол қойды. «Швейцарияның осы бір маңызды шараға қа­ты­­сатындығына біз өте қуа­ныштымыз. Швейцария баламалы қуат көздерін белсенді пайдаланатын мемлекеттердің бірі. Оның үстіне, бүгінгі таңда   климаттың өзгеруі орын алып жатыр. Сондықтан біз тек энергетика тақырыбын ғана емес, оның қоршаған ортаға ықпалы мәселесін де көтеретін боламыз», – деді өз сөзінде ұлттық компания басшысы А.Есімов. «ЭКСПО – бұл Швейцария үшін энергоүнемділік пен жасыл технологиялар саласында атқарған жұмысын әлемге паш ететін үл­­кен мүмкіндік. ЭКСПО-2017 көрме­сінің «Болашақ энергиясы» ат­ты тақырыбы уақтылы әрі маңыз­ды. Дүниежүзі бо­йынша энер­готиімділік пен баламалы энергия көздерін дамыту мәселелері ерекше өзекті. Бұл ретте, Швейцарияның әлемге көрсетері көп», – деді Швейцария Конфедерациясының секция комиссары Мануэль Салхи. Осы келісімшарт арқылы Швейцария ЭКСПО-2017 көр­ме­сін­дегі павильондардың бі­рін таң­дап алып, оның қайда ор­наласа­тындығын анықтады. Ендігі уа­қытта швейцариялықтар павильон­дарының ішкі мазмұны бойынша жұмыс атқаратын болады. Сонымен қатар, Астана ЭКСПО-2017 Давос қаласында ақ­параттық шаралар науқанын жүргізіп жатыр. Автобустар мен отельдер көрме логотипімен безендіріліп, Цюрих қаласының әуежайында арнайы көрме туралы бейнеролик көрсетілуде. Айта кету керек, бүгінгі таңда 70 мемлекет пен 13 халықаралық ұйым Астанада өтетін ЭКСПО көрмесіне қатысатындығын ресми растады. Ұлан САНЖАР.