әні өзіне арналғанын ол қыз білмейді...
– «Аспанға қараймын» әні өзіне арналғанын ол қыз білмейді, – дейді өзін сазгерден гөрі әуесқой композитор, әуесқой композитордан гөрі асаба деп есептейтін Дәуір Сағындықов.
– Бірде Қаскелең ауданындағы Халыққа қызмет көрсету орталығына барып құжаттарымды реттеп жүргем. Сол жерде мен ол қызды жолықтырдым да ғашық болғаным соншалық, неге келгенімді ұмытып қалғандай болдым. Айта кетейін, ол қыздың тал бойында бір мін жоқ, нағыз хор қызындай көзіме оттай басылды. Содан ертесіне құжаттарымды арқалап тағы бардым. Кеше көрген сұлулық сұлулық па, екінші көргенімде ол қыз кешегіден де құлпырып тұрды. Ғашық болсаң аузыңа сөз де түспейді екен, үндей алмай, көркіне тамсанып қайттым.
Үшінші күні тағы баруға мəжбүр болдым. Үшінші көрген сұлулығымды сөзбен айтып жеткізу мүмкін емес, алдында көргенімнен де көрікті болып кеткендей көрінді. Не керек, мен ол қызға кəдімгідей өлердей ғашық болдым. Атын да сұрай алмай кете бардым.
Содан сол қыз көз алдымнан кетпей қиналдым. Маза кетіп, түн ортасы ұйқыдан оянып далаға шығып, бейтаныс аруды армандап отырып: «Аспанға қараймын, Жұлдызды санаймын. Сол жұлдыздың ішінде, Сен жоқсың арайлым. Арманы талайдың, Бағыма балаймын. Мен сені сүйемін! Мен сені қалаймын!» деп бірінші қайырмасы аузыма түсе берді. Үйге кірген бойда жалғастырып, шумақтарын да сəтті жазып шықтым. Сонымен, бұл əн екі сағаттың ішінде жазылған туынды болып шыға келді, – дейді Дәуір.
Дәуір Сағындықовтың мұнан басқа «Айым-Күнім», «Елігім», «О, махаббат», «Еркеле» деген әндері халықтан жап-жақсы бағасын алғанын айту керек.
Әйтпесе, бар болғаны Қызылордадағы бес жылдық домбыра мектебін бітірген әуесқой сазгердің оған дейін де «Əке», «Патшайым», «Ренжіме» сынды əндері бар. Қысқасы, бұл жігіт өзін сазгермін деп еш әспеттемейді. Табиғи талант, Алланың берген қабілеті.
Ал енді бір ән – орындаушыларымыздың абыройын түсіріп, бір ән – көтеріп жатқан өнердегі бәсеке нөпірінде Абай Бегейдің атын шығарған «Аспанға қараймын» екенін өзі де мойындайды. Шоу-бизнеске ересек болғанда қосылған әншінің бұған дейінгі «Мұңайма, Үрбибі» құлаққа жағымды естілсе де, той-томалақта жиі шырқалатын ол ән «Аспанға қараймындай» бағы ашылмағанын білеміз.
Үлкен өнердің соқпағында сегіз жыл сергелдең болған орындаушы, әйтпесе, 10 жасынан бастап өз әнін іздеп келген. Сонымен бүгінде үлкен концерттердің дүрмегінде жүрген Абай Бегей Ақтөбе қаласындағы музыкалық училищені тәмамдаған. Ал жұлдызын жаққан «Аспанға қараймынның» әні де, сөзі де қызылордалық композитор Дәуір Сағындықовтың еншісінде екенін жоғарыда жаздық. Оны әнші осыдан үш жыл бұрын авторынан аттай қалап, сатып алған.
Біз «Аспанға қараймын» әнін Куба елінің «Sin Frontera» атты танымал тобы Абай Бегеймен қосыла шырқағанын көрдік. Біраз уақыт қазақ эстрадасының хитына айналған әнді әрқайсысы бір кездері Кубадағы танымал топтардың мүшесі болған – Rodyn Fernandez, Omar Arango Torres, Efrain Yohandi Fuentes қазақ әншісі Абай Бегеймен бірге орындады.
Айтқандай, кубалықтар Қазақстанға келіп-кетіп, өнер көрсетіп жүргеніне 4-5 жылдай болды. Ал олар «Аспанға қараймынды» тыңдап алып, өз беттерінше оған аранжировка жасап, Абай Бегейді тауып алғанша да екі ай өтеді. Осылайша, қызуқанды кубалық мотивке ие болған ән бұрынғыдан да хит бола түскенін мойындау керек.
Бұл әнсіз қазақтың тойы өтпей тұрған тұста, «Аспанға қараймынның» ырғағы қырғыз көршілерімізге де өте-мөте ұнап, әнімізге жиендік жасаған...
Сол сияқты Ресей әншісі Тимати де концерттерін «Аспанға қараймын» әнінің композициясымен ашып, соның музыкасымен жапқаны да кеше.
Әлеуметтік желілерде отырған ағайындар Тиматидің Астанада, Баку мен Түркияда өткен концерттерін Абай Бегейдің орындауындағы нұсқамен бастағанын біледі.
– Елдің айтуынша, «Аспанға қараймын» Тиматидің қазіргі сүйікті әні көрінеді. Біреулер оны талғамы жоқ деп күстаналағысы келсе де, ешкім оны Тиматиге күштеп таңған жоқ. Біздің жігіттер Тиматимен байланысқа шыққан. Кубалықтар да өз елінде осы әнге клип жасап, бір шумағын өз тілдерінде шырқап жүр. Олар бұл әнді өздерінің «бата» дейтін барабандарына салып айтады, – дейді әнші Абай Бегей.
Қалай десек те, Дәуір Сағындықовтың біраз дәурені жүрді. Бір жағынан осынау әннің танымал болуына 1 телеканалдың «Ду қол шоколад» юморлық шоуы жасаған роликтен кейін Қазақ радиосынан ротациялануы да жақсы септігін тигізді. Режиссер Нұрым Адай осы бағдарламада қазақ әнін Beyonce мен рэпер Jay-Z Drunk in Love клипімен «будандастырып», ролик бірден танымал сайттар мен әлеуметтік желілерді кезіп кеткен болатын. Бейонсенің биімен өте үйлесе кеткен ән өзге тілде сөйлейтін әлеуметті де жалт қаратты.
Әйтпесе, Абай Бегейдің ән қоржынында Ұлықпан Жолдасовтың «Аңсағаным», Нұрлан Еспановтың «Сезім қамалы», «Бағалым» (сөзі Ринат Зайытовтікі) сияқты бірқатар тәп-тәуір әндер бар.
Ал табиғи талант Дәуір Сағындықов жуырда «Шанс» деген əні жарыққа шыққалы тұрғанын айтады. Амандық болса, осы әнім де хит болады, дейді әуесқой сазгер әзіл-шынын араластырып.
Айнаш ЕСАЛИ,
«Егемен Қазақстан».
АЛМАТЫ.
