Ілкімділік

«Кәсіптің көзін тапқан – өмірдің өзін табады». Ежелден келе жатқан осы тәмсілдің өміршең­­­­дігіне күн сайын көз жеткіземіз. Әсіресе, дәл қазіргідей алмағайып кезеңде әлдебір кәсіпті ашып, оның жұмысын жүйелеп, нарықтағы бағыт-бағдарын айқын­дап, дөңгелетіп әкету дегеніңіз үлкен күш. Оның үстіне, алыпсатарлықтың да дәурені өтіп барады. Сондық­тан өндіріспен айналысу тиімді болып тұр. Ірі демей, ұсақ демей, өндіріс саласын дамытсақ, онда шағын және орта бизнестің де көркейетіні ақиқат. Жақында қызылордалық кә­сіп­кер Айкенже Мұқанова нан өнім­дерін шығаратын кәсіпорын ашты. Бұл істе кәсіпкерге мемлекет тарапынан да қолдау болды. Айкенже Мұқанова өз бизнесін екі жыл бұрын бастаған. «Бизнестің жол картасы-2020» бағдарламасы аясында несие ресімдеп, жұбайы екеуі «Сердце Томирис» бала­бақшасын ашқан. Бұл идея кә­сіпкерлер отбасындағы үш баласын бірдей балабақшаға орналастыруды ойластырғанда келген екен. Бизнесте тәжірибелері жоқ болса да, өз кәсібін ашсам деген ынтасы бар азаматтар тез арада өз кәсіптерін дөңгелетіп әкеткен. Осылайша, ісі алға басқан кәсіпкер ендігі жерде жұ­мыс ауқымын жан-жақты кеңей­туді жоспарлап, «Даму» қо­рына кеңес алуға жүгінеді және бастауыш кәсіпкер ретінде «Damu Start-up» бағдарламасы арқылы несие ресімдеуге кеңес алды. Көп ойланбастан шешім қабылдаған А.Мұқанова «Даму» қорының 70 пайыз кепілдендіруі арқасында наубайхана құрылысына 20 миллион теңге несие ресімдеп, бүгінде өндіріс нысаны өз есігін айқара ашып, қызмет көрсетуде. – Наубайханамыздың ашыл­ғанына әлі көп болмаса да, жұмысымыз қарқынды жүріп жатыр. Тәулік бойы қызмет көрсетеміз және бірінші кезекте сапалы әрі дәмді өнімді шығаруды мақсат етеміз. Кәсіпорында нанның бірнеше түрін дәмді етіп әзірлейтін нағыз білікті мамандар жұмыс жасайды. Әзірге біз тек 7 жұмыс орнын аштық, алайда, жоспарымызда наубайхана ішінен кондитерлік өнімдерді шығару бағытын іске қосып, жұмыс өнімділігін арттыруды көздейміз. Бұл да болса жаңа жұмыс орындарын ашуға өз септігін тигізері сөзсіз. Кезінде балабақшаны ашқанымызда, тәжірибеміз аз болса да негізгі мақсатымызға жетеміз деген ойымыз бизнестің жаңа кезеңін жүзеге асыруға әкелді және біз табысқа жететінімізге сенімдіміз. Жұмыс беруші ретінде отбасың мен қарамағыңдағы адамдардың алдында үлкен жауапкершілікті арқалайтының анық. Сондықтан өз бизнесіңді кедергілер мен қиын­дықтарға қарамастан жүзеге асыру табанды еңбекті қажет етеді,– дейді кәсіпкер. Ержан БАЙТІЛЕС, «Егемен Қазақстан». Қызылорда облысы.