Бозарықтағы бес жүз коттедж

Қазір бүкіләлемдік дағдарыс. Қаржы қиындығы барлық жерде бар. Сондықтан, қолымнан не келеді деп отыра берсең жағдайды таразылағандар сөге қоймас. Бірақ, іскерлік осындай сын сағаттарда көрінеді. «Шымкент» ӘКК ҰҚ» акционерлік қоғамы «Бозарық» коттедждік үйлер» инвестициялық жобасын іске асыруға талпынып жатыр. Осы мақсатқа қала іргесіндегі «Бозарық» елді мекенінен 76 гектар жер телімі бөлінген. Әлеуметтік-кәсіпкерлік корпорация жобаны іске асыру үшін «Almaty grand construction» серіктестігімен өзара меморандумға қол қойған. Сол сияқты, «Констракшн КЗ» серіктестігімен сапалы әрі арзан бағада 3D панельді құрылыс материалын жеткізіп беруге уағда байласылды. Өз алдына жеке қалашық болатын аумақта 500-600 тұрғын үй салынады деп күтілуде. Сондай-ақ, мұнда мектеп, балабақша, ауру­­­ханалардан бөлек ірі сауда орын­дары, кітапхана, спорт кешені сияқ­ты нысандар ел игілігіне берілмек. Құдай қос көрсе, Бозарықта коттедждік үйлердің құры­лысы биыл басталады. Бақтияр ТАЙЖАН, «Егемен Қазақстан». ШЫМКЕНТ.