Ерекше әсер алдым

«Нұр Отан» партиясының Астанада өткен кезектен тыс XVII съезінде партия Төрағасы, Елбасы Нұрсұлтан Назарбаевтың жасаған баяндамасын зейін қойып, мұқият тыңдадым. Ерекше әсер алдым. Мемлекеттік саясатқа сай өзіндік үлесімді қосып еңбек етіп жүрген «Нұр Отан» партиясының алдына қойған тұғырнаманы мүлтіксіз орындасақ, еліміз алдағы бес жылда өркениетті дамыған елдер қатарына қосылудың берік қадамын нық басатыны анық. Көшбасшымыз жастардың заман талабына сай оқып, еңбек етуіне жарқын жол ашылғанын, білім беру мен денсаулық сақтау салаларын дамытқан үстіне дамыта түсуді ерекше айтып өтті. Барлық қажеттіліктерді сырттан тасымай ішкі дүниені ұқсата білуді, өзіміздікін өзіміз өңдеп пайдалануды нақтылады. Бұл дегеніміз рынокта теңгемен жұмыс істеудің маңыздылығын білдірудің, айқын басымдығын аңғартудың алғашқы қадамы болып та саналады. Қазақстанда шығарылатын сан алуан шикізатты елде жұмыс істеп тұрған өндіріс орнына сату, сосын зауытымыздан шығарылған сол өнімді тұтынушылар тапсырысына сай сатып алуда теңгемен жұмыс істеу керектігін ұғындырғаны қандай тамаша! Мысалға, әлемдік рынокта үлкен сұранысқа ие болып тұрған алюминий секілді отандық өнімді өңдеп, құрылыс қажеттілігін өтеуге ерекше назар аударды. Бұл ретте индустрияландырудың орны бөлек. Отандық өнімді дұрыс пайдалана білу дегенде бір ғана картопты алсақ, бізден шикізат есебінде өте арзан бағада тонналап сатып әкететін көршілеріміз қытырлақ картоп секілді үлкен сұраныс тудыратын өнімдерін қайтадан өзімізге қымбат бағаға сататыны жасырын емес. Неге біз өзіміз сондай өнім өндіре алатын өндіріс орындарын бірі­нен екіншісін асырып салмаймыз. Сондықтан, қалталы азаматтар қыруар қаражатын шетелдерде жасырғанша ел қажеттілігі үшін Қазақстанға әкеліп өзіне де, еліне де пайда беретін жұмысқа салсын. Ондай азаматтарға ешқандай қысым да, басқа әрекеттер де жасалмайтындығына кепіл болып, сенім беретіндігін де Елбасы ашық айтты. Мұның түбі мемлекет мүддесі үшін істелінетін игілікті іс екенін сол азаматтар түсінуі керек. Елбасының әсерлі баяндамасында бізге береке бас­тауы бірліктің, индустрияландырудың керектігі айқын аңғарылып қана қоймай, жете түсіндірілді. Заман талабына сай заң­герлер білек сыбана еңбек етулері қажет­тігі ұғындырылды. Қорыта келгенде, Елбасы баяндамасын тыңдаған соң, өзімнің түйген бір ойым – Алматы облысы аграрлы өңір бол­ғандықтан, ауыл шаруашылығы өнімдері жетіп-артылады. Сол өнімді қайта өңдейтін өндіріс орындары Жетісу жерінде де жарыса салынып жатса, нұр үстіне нұр болар еді. Оған сенім де бар. Өйткені, өңірде мемлекеттік саясатқа сай атқарылып жатқан сан игі істің куәсі болып жүрміз.  Серік МҰҚАНОВ, «Нұр Отан» партиясы Алматы облыстық филиалы төрағасының бірінші орынбасары.