Құрметті форумға қатысушылар! Қазақстанның жас азаматтары замандастар!
Біз, өңіраралық жастар форумына қатысушылар Қазақстан жастарын еліміздің өркендеп дамуы жолында аянбай еңбек етуге және азаматтық белсенділік танытуға шақырамыз.
Біз, Ақтөбе облысының жастары Қазақстан Республикасы Тәуелсіздігінің 25 жылдығына арналған «Болашаққа 25 қадам» іс-шаралар дестесі басталғандығын жариялаймыз! Мерекелік науқан аясында:
- «25 игі іс» қайырымдылық марафоны («Ардагерлерді ардақтайық» ардагерлер мен мүгедектерге көмек көрсету, «Қамқорлық» жетім балалар мен аз қамтылған отбасыларынан шыққан балаларды қолдау жөніндегі акциялар, жастардың бойында және жалпы қоғамда әлеуметтік сананы қалыптастыру мен әлеуметтік бастамаларға ынталандыру мақсатындағы шаралар);
- «Әр күн спортпен шұғылдан!» спорттық эстафетасы (жастар арасында спорттық сайыстар, саламатты өмір салтын, бұқаралық және аула спорты түрлерін насихаттауға бағытталған акциялар);
- «Бабалар ізімен» тарихи-мәдени жобасы (Қазақстан халқының ұлы тарихи-мәдени игіліктерін, шығармашылық пен өнердің бірегей үлгілерін насихаттауға арналған мәдени шаралар);
- «Экотренд» экологиялық марафоны (қоршаған ортаны қорғауға, энерготиімділікті дамытуға арналған экологиялық акциялар, жастар сенбіліктері);
- «Болашақтың 25 идеясы» жобасы (өнертапқыштар мен жас ғалымдардың инновациялық жобаларының конкурстары, көрмелері).
