Оңтүстік Кореяда азаматтық тікұшақ апатқа ұшырады

АСТАНА. 30 қаңтар. Оңтүстік Кореяның Кимчже қаласына жақын маңайда Чолла-Пукто провинциясындағы орман өртін сөндірмек болған азаматтық тікұшақ апатқа ұшырады. Бұл туралы ТАСС ақпарат агенттігіне сілтеме жасаған egemen.kz тілшісі хабарлады. Жергілікті уақыт бойынша, сағат 14:15-те Тхэан қаласынан шыққан тікұшақ екі сағаттан кейін оралуы тиіс болатын. Алайда әуе көлігі апатқа ұшырап, борттағы жалғыз адам 61 жастағы ұшқыш қаза тапты. Yonhap агенттігінің хабарлауынша, оқиғаның нақты себебі әзірге белгісіз. Мамандар апаттың негізгі себебі, соқыр тұманның салдарынан болуы мүмкін деген болжам жасады. Ал куәгерлер әуе көлігінің күтпеген жерден бір жаққа қарай ауып кетіп, бірнеше рет айналған соң, тау бөктеріне қарай, балалар ойын-сауық кешенінен 200 метр қашықтыққа құлап, жарылып кеткенін баяндап берді. Оқиға орнында ұшқыштан өзге ешкім зардап шеккен жоқ. Аян Әбдуәли. Дерек: ТАСС. Сурет: ria.ru.