Мұсылман қызы шырқаған «Аве Мария»

Ресейдің Түмен облысындағы Тобольск қаласында орналасқан «Әулие Үштік» храмында мұсылман қызы Земфира Шарипова Шуберттің, Бахо-Гуноның, Аркадельттің және Качанидің «Ave Maria» деп аталған туындыларын орындап, Рождествоға жиналған хрис­тиан қауымға өзіндік бір сый-сияпат жасады. Ал орган мен вокалды музыка концерті кешіне католик, православие және мұсылман діндерінің өкілдері қатысты. Соңында храм настоятелі Дариуш Станьчик жоғары деңгейдегі музыкалық өнердің адамдарды жақындастыратынын айта келіп, осындай қыз бен немере тәрбиелегендері үшін Земфираның ата-анасы мен әжесіне алғыс сезімін білдірді. Қала басшысы Владимир Мазур концерт кезінде өзінің жаны рахат тауып, өзгеше бір күй кешкенін жеткізе тұрып, осындай үйлесімділікті бүкіл қала жұртына тіледі. – Земфира Шарипова – біздің Тобольскідегі тілшіміз, – деді «Муслим-инфо» газетінің редакторы Калиль Кабдулвахитов. – Ол – Тобольскіде ХХ ғасырдың басында прогрес­сивті көзқарастағы мұсылмандар қауым­дастығының негізін қалаған Хизрали Бакиевтің шөбересі. Өте талантты қыз, саяхатқа шыққан­ды жақсы көретін ізденімпаз жас. Ол осы кезге дейін Мысырда, Әмірлікте, Түркияда, Өзбекстанда, Әзербайжанда, Қазақстанда, Украинада, сондай-ақ, Ресейдің көптеген аймақтарында болып үлгерген. Енді биыл Иран мен Тәжікстанға барып қайтуды армандап жүр. Земфира тек біздің газетімізді ғана емес, сондай-ақ, Umma72.ru атты порталымызды да мұсылман қауымы жаңалықтарымен қамтамасыз етіп, саяхаттары барысынан жақсы суреттемелер жазып тұрады. Айта кетейік, «Аве Мария» (латыншадан аударғанда, «Қуан, Мария») – христиан дінінің тәмсілдеріне сай, Гавриил (Жәбірейіл) періштенің әулие Марияға Иисусты босанып жатқан кезінде игілік пен жақсылық тілеп айтқан тілегінің бірінші сөз тіркесі. Дамир ҚОЖАМҚҰЛ.