Өңіраралық саудаға сүбелі үлес

Қазақстан аумағы арқылы Қытай – Иран бағытында тұңғыш контейнерлік пойыз жіберілді Иву қаласында (Шығыс Қытай, Чжэцзян провинциясы) Қазақстан аумағы арқылы Иранға транзиттік контейнерлік пойызын жөнелту салтанаты өткізілді, деп хабарлады «ҚТЖ» ҰК» АҚ-тың баспасөз қызметі. Салтанатты шараға Иву қаласының мэрі Шэнь Цзю Пинь мен Қытай теміржол әкімшілігінің басшылары, «Қазақстан темір жолы» ҰК» АҚ Translnvest Group халықаралық логистикалық холдингінің өкілдері қатысты. Жаңа контейнерлік бағыт Қытай, Қазақстан, Түрікменстан, Иран теміржолдары әкімшіліктерінің бірлескен ұйымдастыру шараларының нәтижесінде жүзеге асырылды. Бұл жоба Шығыс Қытайдан Парсы шығанағы елдеріне жүктерді жедел жеткізуге арналған алғашқы логистикалық шешім болып табылады. Пойыз бағыты Қытай теміржолы, Алашаңқай – Достық шекаралық бекеті, Қазақстанның жаңа темір­жол желісі (Жезқазған – Бейнеу, Өзен – Бола­шақ), әрі қарай Түрікменстан желісімен Иран­ның Теһран қаласын жалғайды. Пойыз құрамы аралас жүктер тиелген 40 футтық контейнерлерден тұрады. Бағыттың жалпы ұзындығы 9 мың шақырымнан астам. Теміржолмен жүк 10 тәулік жүрсе, осы аралықты теңіз арқылы 25-30 күн жүреді. Қазақстанның жаңа көліктік-логистикалық инфрақұрылымы бағытты барынша қысқартып, жүкті жеткізу мерзімін жеделдетіп, Еуразия құрлығындағы аймақтық сауданың серпінді дамуына оң ықпал етеді. Контейнерлік тасымалды дамыту еліміздің транзиттік әлеуетін еселей арттырып, бәсекелестікке қабілеттілігін де көтере түседі.