Кеше Қазақстан Коммунистік халықтық партиясы (ҚКХП) Орталық комитеті ұйымның электораттық науқанға дайындығын пысықтау мақсатында аймақтық бөлімшелерімен скайп-конференция өткізді.
ҚКХП-ның Павлодар, Ақмола, Оңтүстік Қазақстан, Шығыс Қазақстан, Алматы, Қостанай облыстары мен Алматы қаласы филиалдарының өкілдері қатысқан скайп-конференцияда республикалық сайлауалды штабтың жетекшісі Айқын Қоңыров ұйымның аймақтық бөлімшелеріне алдағы электораттық науқанға дайындықты бастау туралы нұсқау берді.
«Қазақстан Коммунистік халық партиясы алдында маңызды әрі жауапты миссия тұр. Біз өз жақтастарымызға партиямыздың мақсат-міндеттерін өз деңгейінде түсіндіруіміз керек. Сондықтан, алдағы науқанда Қазақстан коммунистері орталықта және жергілікті жерлерде партияның сайлауалды бағдарламасы аясында тиімді жұмыстар атқаруы тиіс», – деді А.Қоңыров.
Өз кезегінде ҚКХП Орталық комитетінің хатшысы Тұрғын Сыздықов: «Халыққа біздің елді жаңғырту, азаматтық қоғамды дамыту, экономиканың сапалы трансформациялануы және рухани құндылықтарымызды сақтау бағытындағы ұстанымдарымызды жеткізу аса маңызды іс», – деп мәлімдеді.
Сондай-ақ, конференция барысында алдағы сайлауалды үгіт-насихат жұмыстары кезінде бәсекелес партиялардың жұмысына көбірек мән беру қажеттігі де айтылды. Бұған қоса, партияның үгiт-насихат жұмыстары қолданыстағы заң талаптарын қатаң сақтау арқылы жүргiзiлетіні атап көрсетілдi.
Сонымен бірге, Владислав Косарев те өңiрлiк бөлiмшелердiң есебiн тыңдап, сайлау науқанында қамтылуы тиіс жұмыстар жөнінде әңгімелеп берді.
Скайп-конференция қорытындысы бойынша өңiрлiк сайлауалды штабтарын құру, сенiм білдірілетін адамдарды таңдау, тiркеу, үгiт-насихат топтарын қалыптастыру және оларды оқыту, еңбек ұжымдарымен кездесулер өткізу, сондай-ақ, бұқаралық сипаттағы үгiт-насихат шараларын ұйымдастыру туралы шешiмдер қабылданды.
Жолдыбай БАЗАР,
«Егемен Қазақстан».
АСТАНА.