Өз жұмысын бастады

«Ақмола медиа орталығының» мәжіліс залында Сайлауға байқау жасау жөніндегі Ақмола облыстық филиалының төрағасы Ғосман Төлеғұл бұқаралық ақпарат құралдары өкіл­дерімен баспасөз мәслихатын өткізіп, онда сайлау науқанына қоғамдық бақылау жасау тетігі жайлы айтып берді. Сайлау – саяси науқан, оның заң аясында өтуі демократиялық үдерістердің ашықтығын көр­сетеді. Биылғы Парламент Мә­жілісі мен жергілікті мәслихаттар сайлаулары кезектен тыс өткелі отырғандықтан, дайындық шаралары да қолға алынды. Ғ.Төлеғұл өзінің сөзінде сайлау барысына қоғамдық бақылау жасаудың маңыздылығына баса тоқталды. Өркениетке ұм­тыл­ған елі­мізде әділ сайлау өткізу мемле­кетіміздің де беделін көтеретіні анық, деді ол. Жалпы, Ақмола облысындағы барлық сайлау учаскелері толы­ғымен қоғамдық байқаушылармен қамтамасыз етілмекші. Өткен президенттік сайлауда облыс бойынша барлығы 500-ден аса байқаушы жұмыс істеген еді. Бұл жолғы сайлау үдерістері де халықаралық заң талаптары аясында өтетініне сенім білдірді облыстық сайлауға бақылау жасау филиалының төрағасы Ғ. Төлеғұл. Журналистер тарапынан да көптеген сауалдар қойылды. Онда сайлау кезінде заң бұзу фактілері анықтала қалған жағдайда оны шешудің тетіктері әңгіме өзегіне айналды. Бірақ, бұл қоғамдық бақылау комиссиясы сайлау комиссиясының жұмысына араласа алмайды. Тек, байқау құзырын ғана иеленеді. Сондықтан, алдағы сайлаудың заң аясында өтуі үшін аталған қоғамдық комиссия белсене атсалысатын болады. Бақберген АМАЛБЕК, «Егемен Қазақстан». КӨКШЕТАУ.