Үржардағы сүт зауыты

Үржар ауданының орталы­ғын­да жаңадан ашылған сүт қабылдау және өңдеу зауытына тұрғындар күнделікті сүт өткізіп, пұлын қолма-қол алады. Жергілікті халықтың әл-ауқатын жақсартуға, қолдағы өнімін өткізуге сеп болған жаңа сүт зауытының жұмысымен танысқан едік. Былтыр қаңтар айында құру жұмыстары басталған кәсіпорын барлық талапқа сай жабдықталып, үш айда іске қосылды. Облыс әкімінің сүт өндірісін жандандыру жөніндегі тапсырмасы аясында кәсіпкерге коммуналдық меншіктегі ғима­рат тегін беріліп, жобаны қаржы­ландыру жедел жүргізілді. Атап айтқанда, «Арыстанбек-Үржар» ЖШС жетекшісі Талғат Ақбеков «Жұмыспен қамтудың жол картасы-2020» бағдарламасы бо­йынша жеңілдетілген несиеге қол жеткізіп, «Ертіс» әлеуметтік кәсіпкерлік корпорациясынан 12 млн. теңге, Ауыл шаруашылығын дамыту қорынан 5 млн. теңге алды. Бұл қаржыға сүт қабылдау, сақтау және өңдеу қондырғылары сатып алынды. Бүгінде жеті адамды жаңа жұмыс орнымен қамтып отырған кәсіпорын тоғыз айдың ішінде жергілікті халықтан 240 тонна көлемінде сүт қабылдап үлгерген екен. Сүттің литрін жаздыгүні 65 теңгеден қабылдаса, күзде 85 теңгеден, қыс кезінде сүттің майлылығы көбейгендіктен 120 теңгеден қабылдауда. Зауыт әкімшілігі сүт өткізушілерден ветеринарлық анықтаманы талап етеді. Сондай-ақ, цех зертханасында сүт құрамы мұқият тексеріледі. Одан өзге тағы екі зертханамен келісімшарт жасалған. Бұл – сапалы өнім кепілі. Ауладағы сауын сиырдың артылған сүтін өткізуге халық та дағдыланып алды. Мәселен, Ақжар ауылдық ок­ругінің әкімі Тәуіржан Шоманов ауыл тұрғындарының аталған цех­қа былтыр өткізген сүт көлемі орта есеппен 8 млн. теңгені құрағанын айтты. Зауытта тәулігіне 1 тонна сүт өңделеді. Қазіргі кезде ша­ғын кәсіпорын таза сүттен 14 түрлі сүт өнімін шығаруда. Оның ішінде майлылығы түрлі дең­гей­дегі сүттің 5 түрі, сары май, кілегей, сүзбе, құрт, ірімшік және айран сынды өнімдер бар. Сұраныс та аз емес. Бала­бақ­шалар, емханалар, балалар үйі сын­ды мекемелермен келісімшарт жасал­ғандықтан, кәсіпорын ау­дан­дағы мекемелерді сапалы сүт өнім­дерімен толық әрі арзан ба­­ғамен қамтамасыз ете баста­ды. Өнімді өздері жеткізіп бере­ді. Бұл – жергілікті бюджетке де үнем. Мә­селен, сүттің литрі Нау­а­лы ауы­лындағы балалар үйі­не 150 теңгеден, мектептерге 173 тең­­ге­ден сатылады. Яғни, ба­зар нар­­қынан арзан. Сондай-ақ, кәсіп­­орынның «Ақ қайнар» атты өз дү­ке­нінен алушылар да аз емес. – Жазда ауданымыздағы Ала­көл жағалауына, «Барлық-Ара­сан» шипажайына келген демалушылар да біздің өнімдерімізді тұтынады. Ірі қалалардан алыс орналасқандықтан өнімнің сапасы мен табиғи құнары ерекше. Келешекте өндіріс көлемін арттырып, басқа қалаларға, аудандарға да шығаруды көздеп отырмыз, – дейді зауыт директоры Талғат Молдашұлы. Жаңа өндіріске жұмыспен қамту орталығынан жас мамандар жіберілген екен. Шәкәрім атын­дағы Семей мемлекеттік уни­верситетін тәмамдаған екі жас маман заманауи қондырғылармен жұмыс істеуді жақсы меңгерген. Айталық, Талшын Жақсарат есімді зертханашы қыз қабылданған сүттің майлылығын, ақуызын, тығыз­дығын тексеріп, пастерленген өнімді саралау жұмыстарын жүр­гізеді. «Биотехнолог маман­дығын алғаннан кейін «Жұмыспен қамтудың жол картасы-2020» бағдарламасының жастарды өн­дірістік тәжірибеден өткізу тар­мағы бойынша осында келіп, еңбек етудемін. Жұмысым өзіме ұнай­ды», – деді Талшын. Цех техно­логы Сергей Чупринин де жас маман. Ол сүт өндірісінің өте нәзік сала екендігін, оған үлкен жауапкершілікпен қарау қажет­тігін айтады. Сондықтан, өндіріс үдерісінде ең алдымен ескері­летіні – тазалық. Осы талаптарды қатаң сақтайтын жас технолог «Қазақстанда жасалған» акциясы аясында отандық өнімді қол­даудың маңызы зор екенін айтты. Ал Гүлімхан Бақтиярова 1986-1998 жылдар аралығында Үржар­дың ірімшік зауытында жұмыс істеген екен. Ұзақ жылдар бойы жұмыссыз қалған ол маман­дығы бойынша жаңа жұмыс орны ашылғанына қуанышты екенін жеткізді. – Енді дәл осы іспетті сүт қабылдау және өңдеу орны Ма­қан­шы ауылында ашылмақ. Қай­ролла Нығмет есімді Қытайдан оралған қандасымыз 5 млн. теңге жеңілдетілген несие қаржысын алды. Оған өз қаражатын қосты. Ақпан айының ішінде ашылатын кәсіпорын өнімдері де өңірдегі білім беру, денсаулық сақтау жә­не қорғаныс саласындағы меке­мелерді арзан әрі сапалы сүтпен қамтамасыз ететін болады. Сон­дай-ақ, Үржар өңірінде алдағы уақытта бірқатар тауарлы сүт фермасы ашылмақ. Жоспар бойынша, Мақаншы ауылындағы «Сағади» шаруа қожалығында 200 бас сауын сиырға есептелген ферма құрылысы биыл аяқталады. Аталған жобаға «ҚазАгроҚаржы» АҚ-тан 176 млн. теңге несие қара­жаты бөлінді. Ресейден 47 бас асыл тұқымды мал жеткізілді. Со­нымен бірге, онда 150 басқа арнал­ған бордақылау алаңы да болады. «Бәтуа» ЖШС 400 басқа арналған тауарлы сүт фермасы мен 5 мың басқа арналған бордақылау алаңын салмақ. Ал «Юбилейный» шаруа қожалығы 200 басқа арналған сүт фермасын салуды көздеп отыр. Қазіргі кезде бұл шаруашылыққа Ресейден «Симменталь» тұқымды 115 бас сиыр сатып алынды. Осының барлығы ауданның сүт өндіру әлеуетін арттыра түсетін болады, деді аудан әкімінің орынбасары Жарқынбек Байсабыров. Думан АНАШ, «Егемен Қазақстан». Шығыс Қазақстан облысы, Үржар ауданы.