Зика вирусы Ресейге де жетті

Ресейдің бір азаматының Зика ауруын жұқтырғаны анықталды. Ол Мәскеу емханаларының біріне дене қызуы көтеріліп, денесіне бөрте пайда болғаны туралы шағымданады. Дәрігерлер одан анализ алып, тексергеннен кейін әйелдің Зика аурумен ауыратынын анықтайды. Зика ауруы былтыр Африка мен Азия елдерінен шыққан. Қазір онымен жер жүзінде бірнеше мың адамның ауыратыны анықталып отыр. Олардың көбісі Африка мен Азия құрлығында. Кейінірек Оңтүстік және Солтүстік Америка елдеріне де тарала бастаған. Енді, міне, Еуропаны аттап өтіп, Ресейге де жетіп отыр. Бұл елде ауруға шал­дыққан әзірге жалғыз адам. Сондықтан дәрігерлер оны дереу ауруханаға жатқызып, ешкіммен араласпауын талап етті. Науқастың айтуынша, бәрі аяқ астынан бол­ған. Ол ауруды жұқтырғанын өзім де білмей қалдым, дейді. Қазір әйел ауруханада тиіс­ті дәрілерді алып жатыр. Ал дәрігерлер алдын алу үшін әйел­дің отбасын тексерді. Абы­рой болғанда, ешкімнен ештеңе та­был­ған жоқ. Содан кейін дәрі­герлер әйел мінген ұшақты да тексеріп көрді. Ол жерде де адам­ның денсаулығына қауіпті болатындай ештеңе табылмады. Мамандардың айтуынша, Зика ауруын Aedes aegypti деген масалар жұқтырады. Қолда бар мәліметтерге қара­ғанда, Зика ауруына қарсы емді Ресей дәрігерлері тапқан. Олар жақында бұл жабдықты Женевада таныстырды. Дастан КЕНЖАЛИН, «Егемен Қазақстан».