Жас спортшыларымыз жарап тұр

Бұрнағы күні Норвегияның Лиллехаммер қаласында өтіп жатқан жасөспірімдер арасындағы ІІ қысқы Олимпия ойындарында Қазақстан қоржыны тағы бір жүлдемен толықты. Атап айтқанда, мәнерлеп сырғанаудан сынға түскен отандасымыз Элизабет Тұрсынбаева екі жаттығу қорытындысы бойынша 167,88 ұпай жинап, қола жүлдеге қол жеткізді. Бірінші жаттығу – қысқа бағ­дарламадан кейін 16 жастағы қаршадай қазақ қызы 59,11 ұпаймен екінші орында тұрғанын атап өткен жөн. Алайда, еркін бағдарламадан кейін ол бір саты төмен сырғуға мәжбүр болды. Нәтижесінде Олимпиада «алтыны» 186,04 ұпай жиған ресейлік Полина Цурскаяға бұйырды. Ал күміс жүлде 169,50 ұпайға ие болған оның отандасы Мария Сотсковаяның еншісінде кетті. Бүгінде ересектер арасында бақ сынап, отандық жанкүйерлерге танылып қалған Элизабет Тұр­сынбаева аталған Олимпиадада бұдан да жоғары орынға лайық болған еді. Жасыратыны жоқ, одан көбіміздің тек «алтын» күт­кеніміз де рас. Десек те, бұл жолы бұйырғаны «қола» болды. Осы жеңісті жол 2018 жылы Оңтүстік Кореяның Пхенчхан қала­сында өтетін қысқы Олим­пиадада жалғасын тапсын деп тілейік. Айта кетейік, Лиллехаммердегі жасөспірімдер Ойыны басталғалы Қазақстан қоржынына үш жүлде түсті. Нақты айтар болсақ, дүбірлі доданың үшінші күні биатлоннан 6 шақырымдық спринттік жарыс­та сынға түскен Арина Пантова Олимпиаданың қола медалін мойнына тақты. Ал кеше конькишіміз Әнуар Мұхамәдиев аралас команда сапында спринттік сайысқа қа­тысып, екінші орын алды. Еламан ҚОҢЫР, «Егемен Қазақстан».