Кеңес орталығы қолын созды

Алдымдағы жігіттің бой-бітімі таныс көрінді. Есіме енді түсті. Бұл анау бір жылдары газет тапсырмасымен «Тәуелсіздік құрдасы» айдарына мақала жазатын Ваня Лебедев қой. Өте талантты жас. Кәдімгі «жігітке жеті өнер де жа­расадының» дәл өзі. Мектепті үздік бітіріп, Шоқан Уәлиханов атын­дағы Көкшетау мемлекеттік университетінде грантпен оқып жүрген... Бойын қанша тік ұстауға ты­­­рысқанымен, сылтып басады. Қуып жеттім. Танып жатыр. Қолымызды қатты қысып аман­­­­дастық. Хал-жағдайын сұра­ғанымда, «Бәрі де артта қал­ды» деген сөзімен көп мағына аңғартты. Қазбалап жатпадым. Жайлап басып қала жастарының «Консалтинг орталығына» кіріп кетті. Сұрастырып білдім. Универ­ситетті 2013 жылы «Ақпараттық жүйелер» мамандығы бойынша тәмамдапты. Сол жылы магис­тратураға түсіп, 2015 жылы техника және технология магистрі атанған. Тағдырдың тәлкегіне не шара. Ваня Лебедев классикалық би жаттығуынан келе жатқанда, ала­көлеңкеде бұзақылардың қоқан-лоқысына ұшырайды. Тәп-тәуір спортшыға әлдері келмейтінін білген әлгілер бірнеше жерден пышақ салыпты. Ауруханаға ес-түссіз жеткізілген. Дәрігерлер консилиумы жедел ота жасап, оның аяғын кесуге шешім қабылдаған. Жантүршігерлік оқиға жас жігіттің жігерін мұқалта ал­маға­нын нағыз ерлікке балауға болады. Ерлік дейтініміз, ол оқуын жалғастырумен қатар, спортпен жан аямай айналысты, қоғамға пай­далы болуды ойлады. Бүгінде Иван Лебедев қимыл-тірек жүйесі зақымданған спортшылар арасында аты алдымен аталатын азамат­қа айналған. Ол пауэрлифтинг және көпсайыс жарысы бойынша 2014 және 2015 жылғы облыс чемпионы. Сондай-ақ, Талдықорған қа­ла­сында өткен Қазақстан чемпионатында II және III жүлделі орындарға ие болса, Павлодар қаласында болған Қазақстандық параолимпиадалық ойындарында II орынды жеңіп алыпты. Иван өзінің еңбек жолын «Көк­­­­­шетау қалалық ақпараттық кітапханалар» коммуналдық-мем­лекеттік мекемесінде бастаған екен. Бірақ, әртүрлі жағдайларға байланысты үйінде екі жылдан астам жұмыссыз отырыпты. Осы­дан екі ай бұрын ол күтпеген жер­ден қалалық жастар ұйымының Консалтингтік кеңес орталығы­нан шақыру алған. Сынақтан мүдірмей өткен Иван Лебедев қазір информатика және жүйелік технология маманы қызметін атқаруда. Біз оны өзінің сүйікті кәсібінде табысты болуына тілектестік біл­діріп, Консалтингтік кеңес орталығының ұжымына алғы­сымызды айттық. Бақберген АМАЛБЕК, «Егемен Қазақстан».  Ақмола облысы.