Сайлаудың әділ өтуі – ел абыройы

Кеше Астанада Еуропадағы қауіпсіздік және ынты­мақ­тастық ұйымының (ЕҚЫҰ) Демократиялық институт­тар және адам құқықтары жөніндегі бюросы (ДИАҚБ) Қазақ­станда сайлау өткізу барысын байқау миссиясының басшысы Борис Фрлек баспасөз мәслихатын өткізді. Жиында Қазақстан тарапының шақыртуымен келген миссияның жұмысы ресми түрде басталғаны жария етілді. Брифинг барысында ЕҚЫҰ ДИАҚБ миссиясының басшысы, елші Б.Фрлек алдағы сайлау науқанында миссияның негізгі атқаратын мақсат-міндеттеріне және оның құрамына кеңінен тоқталды. «Миссия құрамында Астанадағы 11 сарапшыдан тұра­тын негізгі топ, сондай-ақ, 23 ақпаннан бастап 2 адамнан тұра­тын командамен барлық өңірлерде жұмыс істейтін 28 байқаушы жұмыс істейді. Бұдан бөлек, ДИАҚБ ЕҚЫҰ-ға мүше елдерге қысқа мерзімге 400 байқаушы жіберу туралы ұсыным жасайды. Бұл байқаушылар сайлау басталуына бірнеше күн қалғанда келеді. Жалпы, миссия сайлаудың халықаралық міндеттемелерге, демо­кратиялық сайлау стандарттарына және ұлттық заң­намаға сәйкестігін бағалауды көз­дейді. Халықаралық байқаушылар депутаттықтан үміткерлер мен электоратты тіркеуді, сайлау комиссиясы мен тиісті мемлекеттік органдардың жұмысын, сайлау туралы заңнаманың орындалуын және сайлау өткізуге қатысты дау­ларды шешуді зер салып қадағалайды. Сайлау науқанын жариялау жөніндегі бұқаралық ақпарат құралдарының жұмысын байқау да миссияның міндетіне кіреді», – деді Б.Фрлек. Сондай-ақ, ол миссия мүше­лері байқау барысы бойынша мемлекеттік органдармен сая­си пар­тиялардың өкілдері­мен, үміт­керлермен, сондай-ақ, азаматтық қоғам, БАҚ және халықаралық бірлестік өкілдерімен кездесулер өткізетінін жеткізді. Сонымен қатар, Б.Фрлек сайлау күні байқаушылар сайлау учас­келерінің ашылуын, дауыс беру барысын, бюллетеньдерді есептеу және сайлау қорытындысын шығаруды қадағалайтынын айта келіп, «Халық дауыс беретін күні ЕҚЫҰ-ның Демократиялық инс­титуттар және адам құқықтары бюросы ЕҚЫҰ Парламенттік Ассамблеясының делегациясы және Еуропа Кеңесінің Парламенттік Ассамблеясымен бірлесе жұмыс істейді. ДИАҚБ аралық және байқау миссиясы аяқталғаннан кейін шамамен сегіз апта ішінде қорытынды баяндамасын жариялайды», – деді. Оның айтуынша, ЕҚЫҰ ДИАҚБ-ның сайлауды байқау миссиясы мен Астанадағы ЕҚЫҰ өкілдігі жеке және өз өкілеттіктеріне сәйкес әрекет етеді. Жолдыбай БАЗАР, «Егемен Қазақстан».