Бельгияның астанасы – Брюссель қаласында Еуроодақтың соңғы жылдардағы ең бір күрделі саммиті болып өтті. Күрделі дейтіннің жөні бар. Ұлыбритания өзінің бірқатар талабын алға тартып, Еуроодақ елдері басшыларына ультиматум қоюы, талаптары орындалмаса, мүшеліктен шығатынын айтуы, Еуропаға ағылған босқындар проблемасының уақыт өткен сайын қоюлана түсуі осылай деуімізге негіз болып отыр.
Сонымен, Еуроодақтың миграция жөніндегі саммиті нәтижесіз аяқталды. Осы аса маңызды мәселеге қатысты екі күнге есептелген пікірталас ұзаққа созылса да, бір күн ішінде мәресіне жетіп, саммиттің екінші күні алынып тасталды. Еуроодақ төрағасы Жан-Клод Юнкер мен Еуропалық кеңестің басшысы Дональд Туск қорытынды баспасөз мәслихатында мемлекет басшылары миграциялық дағдарыспен күрес бағдарламасы, сондай-ақ, шешуші транзиттік елдердің бірі болып табылатын Түркиямен бірге осы проблемаға бірлесіп іс-қимыл жоспарын жасау бойынша келісім жасалғанын атап көрсетті. Алайда, бұл уағдаластықтар нақтылықтан ада. ЕО елдері миграция проблемасын шешуге қанша ақша шығындауға дайын екенін, немесе Анкараға көмек көлемі қаншалықты болатынын айтқан жоқ.
Миграциялық дағдарыспен күрес бағдарламасының өткен күздің басында талқыланған шаралардан, іс жүзінде, өзгешелігі шамалы. Олар: ЕО шекарасын нығайту, қабылдау орталықтарын құру, босқындарды тіркеу мен сорттау, елінде басына қатер төнетін адамдарға ғана баспана беріп, экономикалық жағынан ауқаттыларын үйлеріне қайтару.
Мигранттарды жылдам сорттау үшін ЕО «қауіпті» және «қауіпсіз» елдер тізімін жасамақ. Соған сәйкес, алғашқыларына жататындар, тұтастай алғанда, босқындар ретінде, ал екіншілері экономикалық мигранттар ретінде қарастырылатын болады. Босқындар, квоталарға сәйкес, ЕО-ның барлық елдеріне орналастырылады. Өткен жылдың қыркүйек айының соңында үлкен қиындықпен бекітілген квота жүйесі туралы мәселе бұл жолы Брюссельде көтерілген жоқ. Сондай-ақ, дағдарысты реттеу үшін квоталардың мүлдем жетіспейтіндігі проблемасы да қаралмады. Бүгінгі күнге Еуроодақ елдері 160 мың босқынды бөлу туралы уағдаласса, соңғы кездері ғана Еуропаға келген заңсыз мигранттар саны 710 мың адамды құрап отыр.
Әлемдегі және Сирия мен Ливиядағы жағдайларға қатысты айтатын болсақ, ЕО бұрынғысынша аталған елдердегі дағдарысты саяси жолмен шешуге уәде берді. Бірақ бұрынғы тезистер сөзбе-сөз қайталанғаны болмаса, саммит ешқандай жаңа ұсыныс жасаған жоқ.
ЕО саммиті Ұлыбритания премьер-министрі Дэвид Кэмеронның алдағы қараша айына дейін қоғамдастықты реформалауға талап дайындау туралы ниетін құптады. Мұны саммит қорытындысы бойынша өткен баспасөз мәслихатында Дональд Туск мәлімдеген. Ал Ұлыбританияның ЕО-да қалуы немесе одан шығуы туралы референдум, Дэвид Кэмеронның уәдесіне сәйкес, 2017 жылдың аяғында өтетін болуы тиіс. Бірақ бірқатар жергілікті БАҚ-тардың пайымынша, дауыс беру осы жылдың өзінде-ақ ұйымдастырылуы мүмкін.
Кэмеронның өзі болса, елінің бірлестік құрамында қалғанын қалайтын секілді. Бірақ ол бұл үшін Брюссельден ЕО-ны реформалауға және Ұлыбританияға билік өкілеттілігінің айтарлықтай бөлігін қайтаруға қол жеткізуге уәде беріп отыр. Дегенмен, ЕО-ға мүше басқа елдер Ұлыбритания талаптарына құлақ қоймаған жағдайда, Кэмеронның ЕО-дан шығу үшін жұмыс істейтіні күмәнсіз.
Анкарадағы адам айтқысыз тағылық
17 ақпан күні кешкісін Түркияның астанасы Анкара қаласында террорлық акт жасалды. Жарылыс түрік астанасының әкімшілік орталығында, нақтылай айтқанда, Түрік Республикасы қорғаныс министрлігінің бас штабы мен парламент ғимаратына жақын жерде болған. Мина салынған автокөлік оған әскери қызметшілер отырған автоколонна жақындай берген кезде жарып жіберілген.
Лаңкестік салдарынан 28 адам қаза тапса, 61-і зардап шеккен, яғни түрлі деңгейде дене жарақатын алған. Араларында ауыр жараланғандар да баршылық көрінеді. Сондықтан, құрбандықтар саны артуы ықтимал делініп отыр. Қаза тапқандардың және зардап шеккендердің басым бөлігі Түркия қарулы күштерінің өкілдері болып табылады. Жалпы, құрбандықтардың осыншалықты көп болу себебі лаңкестіктің кешкі уақытта, адамдар жұмыстан үйлеріне қайтып бара жатқан кезде жасалуымен де түсіндіріледі. Террорлық актіні ұйымдастырушылар мәселенің осы жағын да жан-жақты ойластырғаны байқалады.
Түрік Республикасының премьер-министрі Ахмет Дәуітоғлы бұрнағы күні террорлық актіге осы елде террорлық ұйым болып есептелетін Күрдістан жұмысшы партиясы мен Халықтық өзін өзі қорғау жасағы (сириялық күрдтер) өкілдерінің қатысы бар деп мәлімдеді. Түркия үкімет басшысының сөзіне қарағанда, жарылысты 1992 жылы Сирияда туған Салих Неджар жүзеге асырған көрінеді. Күдікті тоғыз адам қамауға алыныпты.
Түркияның авиациясы Анкарадағы террорлық актіге күрдтердің Ирактың солтүстігіндегі шептеріне жан-жақты соққылар берумен жауап қайтарды. Бұл туралы «Рейтер» агенттігі хабарлады. Агенттіктің ақпаратына қарағанда, бомбалауға Түркияда тыйым салынған Күрдістан жұмысшы партиясының бірнеше лагері ұшыраған. Шабуыл салдарынан 65-тей адам қаза тапқан. Олардың көбі қарулы жасақ мүшелері болса, араларында жоғары шенді командирлер де бар делініп отыр.
Күрдтер – Сирия жанжалына қатысы бар тараптардың бірі. Олар «Ислам мемлекеті» (Қазақстанда тыйым салынған) делінетін қарулы топпен күресе отырып, Сирия мен Ирактың солтүстігінде тәуелсіз ел құруды қалайды. Сонымен бір мезгілде, Күрдістанның жұмысшы партиясы Түрік Республикасының аумағында өз халқының ұлттық автономиясын құрғысы келеді. Кез келген елдің өз аумағында басқаның автономия құруына жол бергісі келмейтіні айтпаса да түсінікті.
Осы қанқұйлы тағылық актіге байланысты Түркия президенті Тайып Режеп Ердоған Әзербайжан Республикасына жоспарланған ресми сапарынан бас тартты. Елдің премьер-министрі Ахмет Дәуітоғлы да Брюссельде аяқталған Еуропалық одақтың алқалы басқосуына, яғни саммитіне бара алмайтынын жария еткен еді.
Бұрнағы күні, сондай-ақ, Түркияның оңтүстік-шығысында әскери конвойға шабуыл жасалған. Жеті адам қаза тапты деген мәлімет бар. Бірақ нақты қанша адамның көз жұмғаны белгісіз болып отыр. Конвой Диярбакыр мен Бингель қалаларын байланыстыратын жолда келе жатса керек.
Бүгінгі тынышсыз әлемде Түркияға қатысты оқиғалар мұнымен тәмамдалмайды. Швецияның астанасы – Стокгольм қаласының маңындағы түрік мәдени орталығының ғимаратында да жарылыс орын алды. Жарылыстың күштілігіне қарамастан (түнгі 23 сағат 35 минутта болған), ғимаратта ешкім болмағандықтан, құрбандықтар жоқ көрінеді.
Мамадияр ЖАҚЫП, журналист.