Ауыл шаруашылығы министрі Асылжан Мамытбеков Оңтүстікте екі күндік іссапарда болды. Оңтүстік Қазақстан облысына республика бойынша жылыжайдың 87 пайызы тиесілі. Яғни, мемлекеттің көкөніс өнімдеріне қажеттілігін өтеуде Оңтүстіктің әлеуеті үлкен. Министр «ҚазАгроном» серіктестігінің 3 гектарға салған жылыжайының жұмысымен танысты.
«Бизнестің жол картасы-2020» бағдарламасы бойынша 1 млрд. теңгеге салынған жылыжай соңғы технология жетістіктерінің жемісін көруде. Серіктестіктің әкімшілік директоры Тоқсаба Тоқсанбаев 813,1 млн. теңгені «ҚазАгроҚаржы» АҚ-тан несиеге алғандарын айтады. Ал, қалған 237,5 млн. теңге өздерінің үлесі. Қыс, көктем мезгілдерінде 540 тонна қияр жинаған серіктестік жаз, күз мезгілінде 240 тоннаға дейін қызанақ алыпты. Биылғы өнімнің басы келісі 400 теңгеден айналған. Қайда өткіземін дейтіндей емес, Ресейдің Новосібір қаласымен келісімшарт бар. Ал, қазақстандық нарықта Қарағанды облысымен байланыс орнатылған.
Бұдан кейін Асылжан Сарыбайұлы көршілес «Ифтихари» қожалығына тиесілі екі гектар алқапты алып жатқан жылыжайда болды. Бұл шаруашылық та мемлекеттік қолдаудың арқасында шаруасын түзеп алған.
Жылыжайға салынған 500 млн. теңгенің 300 миллионы «ҚазАгроҚаржы» АҚ-тан жеңілдетілген несиемен алынған. Израильдің технологиясын пайдаланып отырған шаруашылықтың өндірістік қуаты 400 тоннаға дейін жетеді.
Министр жылдың төрт мезгілінде де жұмысын доғармай жұмыс жасап отырған жылыжайлардың иелеріне табыс тілей отырып, кейбір түйткіл жайттарды тілге тиек етті.
Жаңа жыл алдында Астана мен Алматыда қияр мен қызанақтың килосы 1200 теңгеге дейін көтеріліп кеткен. Сол кезде Оңтүстік жылыжайлары өнімінің әр килосын 500 теңгеден өткізе алмай, сарсаңға түскен. Яғни, ортадағы делдалдардың жұмысы жақсы жолға қойылған. Сондықтан, өндірістік қажеттіліктерден бөлек сауда логистикасы, тасымалдау мәселелерін шешудің тетігін ойластыру керек. «Біз бұл мәселені шаруа мен сатып алушы ыңғайына сай шешіп, бағаны біршама тұрақтандырамыз», деді ол.
Сол күні министр «Rixos Khadisha Shymkent» қонақ үйінің мәжіліс залында Оңтүстіктің фермерлерімен кездесіп, көптеген сауалдарына жауап берді.
Ауыл шаруашылығын дамытуға елеулі әсері бар, келелі мәселелер талқыланған жиынға облыс әкімі Бейбіт Атамқұлов та қатысты.
Бақтияр ТАЙЖАН,
«Егемен Қазақстан».
Оңтүстік Қазақстан облысы.