Барлық кезеңді байқайды

Шығыс өңірінде алдағы сайлаулардың ашықтығы мен әділдігін арнайы ашылған орталық қадағалайды. Бұл туралы облыстық ақпарат орталығында өткен брифинг барысында Сайлаудың өту кезеңдерін байқау жөніндегі өңірлік орталығының жетекшісі Людмила Гейцман мәлімдеді. Баспасөз мәслихаты барысында жаңадан құрылған орталықтың қызметі мен міндеттері танысты­рылды. Сайлауды байқау жөнін­дегі республикалық қоғамдық ко­мис­сияның филиалы болып табылатын бұл орталық Шығыс Қазақ­стан облысы аума­ғындағы электоратты науқанда ашық­тықтың сақталуын, кез келген сайлау үдерісінің бұзылуына жол берілмеуін және қателіктердің дер кезінде түзетілуін қадағаламақ. Орталық құрамына үкіметтік емес ұйымдар өкілдері, қоғам қайраткерлері мен ғылыми қыз­мет­керлер енді. Сайлаудың өту кезеңдерін байқау орталығының жетекшісі Людмила Гейцманның айтуынша, өңірлік орталықтың құрылуы мен қызмет етуі – демо­кратиялық институттарды дамыту мен азаматтық қоғам өкілдерінің ел өміріндегі маңызды қоғамдық-саяси оқиғаға белсене қатысуының жарқын үлгісі болмақ. Яғни, сайлауды өткізудің барлық кезеңінде, дауыс беру күнінде де қоғамдық байқау жүйесі жүзеге асырылады. Өңірдің әр сайлау учаскесінде орталық өкілдері, тәуелсіз байқаушылар жұмыс іс­тейді. Олардың негізгі мақсаты – элек­тораттық үдеріске қатысушы бар­лық кандидаттарға тең жағдай жасау, сайлау үдерісіндегі заң бұзу­шы­лықтардың жолын кесу жә­не оны дер уақытында түзеу, әкім­шілік ресурстардың қолда­ны­луының алдын алу болмақ. – Шығыс Қазақстан облы­сын­дағы сайлаудың өту кезеңдерін байқау жөніндегі өңірлік орталық сайлау заңнамасының сақталуы үшін қоғам тарапынан ішкі тексеру жұмыстарын жүргізеді. Ал­дымыздағы Парламент Мәжі­лісі мен барлық деңгейдегі мәс­лихаттар сайлаулары азамат­тарымыздың белсенділігін көтеріп, халықтың жоғары саяси мә­­дениеті мен демократиялық дәс­­түр­лерді дамытудың кепілі бола­ды деп сенеміз, – деді Л.Гейц­ман. Айта кеткен абзал, комиссия мүшелері халықаралық бай­қау­шылар миссиясымен, облыс­тық сайлау комиссиясымен, кан­дидаттардың сайлауалды штабтарымен, бұқаралық ақпарат құрал­дарымен және азаматтық сектор өкілдерімен тығыз әріптестік орна­та отырып, қызмет етеді. Ор­та­лықтың облыстық штабы Өс­ке­мен қаласында А.Пушкин атын­дағы облыстық кітапханада орналасқан. Думан АНАШ, «Егемен Қазақстан». ӨСКЕМЕН.