Партия қатары жастармен толықты

Парламент Мәжілісі мен мәслихаттар сайлауларына үміткерлер үгіт-насихат шараларын жүргізуге белсене кірісіп кетті. Үлкен саяси додаға түскен «алтылықтың», яғни 6 партияның санатында Жалпыұлттық социал-демократиялық партия да бар. Орталық сайлау комиссиясы партия тарапынан ұсынылған 23 үміткерді тіркеуден өткізіп, жеребеге сәйкес Жалпыұлттық социал-демократиялық партия сайлау бюллетенінде бесінші орында тұр. Жалпыұлттық социал-демо­кра­тиялық партияның (ЖСДП) сайлауалды бағдарламасына сай алғашқы өткен Алматыдағы басқосуында жас буын өкілдері партия қатарына қабылданды. Өз жақтастарымен емен-жарқын ашық әңгіме барысындағы өткен бұл шара еліміздегі оппозициялық партияның сайлауға құлшынысынан хабар бергендей. Алматы қалалық филиалының жетекшісі Тазабек Сәмбетбайдың алдағы қызу нау­қандағы ұйымның көздеген мақ­саты туралы толғана сөйлеген сөзі де көпшіліктің көңіліне қонған секілді. Егер сайлауда үміткерлер жеңіске жете қалса, Парламенттің биік мін­берінен партияның қоятын көкей­кесті халықтық мәселелердің ауқы­мы баршылық. Осыған орай шешен пар­тияның өз сайлаушыларына ұсынып отырған шаралар кешеніне кеңінен тоқталды. Ол негізінен алғанда әлеуметтік, экономикалық және саяси саланы қамтиды. Әрбір партия саяси додада өз ұстанымын нақтылайды емес пе. Бұл тұрғыдан алғанда, партияның сай­лауалды бағдарламасында айқын­далғанындай, «ЖСДП өзінің көп жыл бойы ұсынып келе жатқан қайта құруларды жүзеге асыруға билікті көндіру, еліміздің ішкі тірегін бекіту, Қазақстанды экономикалық жағынан пәрменді, әлеуметтік жауапкершілігі бар, табыс­ты еркін, шын мәнінде тұрақты және тәуелсіз мемлекет ету үшін Парламент Мәжілісі сайлауына қатысады». «Ел таңдауы – халық билігі!» деген ұранмен шыққан ЖСДП әлеуметтік салада елімізде әлемдік тәжірибені пайдалану керектігін алға тартады. Мәселен, байыған азаматтар белгілі бір сомадан тыс тапқан табыстарының 50-60 пайызын қазынаға құюы тиіс. Қаны қызу бір партия мүшесі атып тұрып партия ішіндегі алауыздық пен өткен тарихи кезеңдегі екіге жарылу жайын дауламақ болған еді, жиналыс төрағасы оған да лайықты тойтарыс берді. Бұл сайлауда партия жастар қанатына арқа сүйеп отырғанын жеткізді. Партияның жас мүшесі Әнуар Шотбай өзінің партия алдындағы қызметін тарихи «Алаш» партиясының рухани жалғасы сипатында жал­ғас­тыратынын айтты. Әнуар Шотбайдың әріптесі Қуат Күнболат та өзінің сөзінде мақсаты елге қызмет ету болып табылатынын мәлімдеді. Партиялас серік­терінің ойы көп жағдайда бір жер­ден шығып жатқаны көңілінде риза­шылық сезімін туғызатынын біл­дір­ді. Оның тиянақты құрған ойлы ле­біздеріне партия мүшелері риза­шылық танытты. Жалпыұлттық социал-демо­кра­тиялық партияны өзіндік бағыт-бағ­дары үшін жан-жүрегімен қол­дай­­тынын білдірген тағы бір жас Мәди Омаров өзінің либералдық көз­қараста қалатынын білдірді. Солай бола тұра, Мәди Омаров бір топ жас замандастарының сапында партия қа­тарына өтті. Жастарға Жалпыұлттық социал-демократиялық партияның мү­шесі екендігін білдіретін құжат тапсырылды. – Өркениетті елдің болашағы – сіз­дер­сіздер! Туған еліміздің болашағы үшін, жарқын келешегі үшін күресте бір­ге болайық, жеңіске бірге жетейік! – деді төраға партия қатарына келіп қосылған жастар легін шын жүректен құттықтап. Талғат СҮЙІНБАЙ, «Егемен Қазақстан». АЛМАТЫ.