Ақжарда оңалту орталығы ашылды

Тарбағатай ауданының Ақжар ауылында балаларға арналған оңалту орталығы ашылды. Жаңа мекемеге жергілікті бюджеттен 15 миллион тең­ге бөлінген. 15 адамды жұмыспен қамтыған орталық қызметкерлерінің орташа еңбекақысы 50 мың теңгені құрайды. Оңалту мекемесінде қимыл-қозғалысы мен ақыл-ойы тежелген 15-17 жас аралығындағы балаларға әлеуметтік медицина­лық, психологиялық, еңбек және музыка, логотерапия, денешы­нық­­­тыру мамандары қызмет көр­сетеді. Жалпы, аудан бо­йынша оңалту орталығымен 28 бала қам­­­тылса, Ақжар ауылындағы ор­та­лыққа 13 бала қабылданды. Бұл меке­ме Ақсуат ауылындағы пси­хоневрологиялық ауытқуы бар балаларға арналған жартылай ста­ц­ио­нарлық оңалту әлеуметтік-медициналық орталығының бө­лім­шесі ретінде ашылғанын айта кетейік. Оңалту орталығының ашылу шарасына қатысқан аудан әкі­мі Ділдәбек Оразбаев Елбасы тапсырмасымен мүмкіндігі шек­теулі балалар мемлекет тарапына қам­қорлыққа алынғанын, оларға үздіксіз әлеуметтік-медициналық қызмет көрсетудің түрлі жолдары қарастырылғанын, соның бірі шалғай өңірлерде оңалту орта­лықтарының ашылуы болып отырғанын ерекше атап өт­ті. Сондай-ақ, аудан басшысы ор­талықты жабдықтауға қол ұшын созған мекемелердің жетекшілері мен кәсіпкерлерге ризашылығын жеткізді. «Бала – бауыр етің» дей­ді халқымыз. Ешкім баласының жарымжан болуын қаламайды. Бірақ, өмірдің өз заңы бар. Ақ­жар­­­лық­тар жаңадан ашылған орталыққа тарту-таралғыларымен де келіпті. Олардың бірі «Отау-ТВ» спутниктік табағын сыйласа, енді бірі кілем тарту етіп жатты. – Елбасы Жолдауында атап көр­сеткендей, мүмкіндігі шектеулі жандар тек жәрдемақы алып отырмауы керек. Олар да ортаға бейімделіп, қоғамдық өмірден тыс қалмауы тиіс. Бұл ретте келешекте Қазақстанның кедергісіз аймаққа айналуы көз­делгенін айта кеткеніміз абзал. Осыған дейін квота алған балалар ірі қалаларға барып емделіп жүрді. Бірақ квота барлық балаға жете бер­мейді. Сондықтан, төрт қа­быр­ғаға қарап жатқан ауыл балаларына бұл орталықтың тигізетін көмегі көп болады, – деді аталған оңалту орталығының меңгерушісі Меруерт Дүйсенова. Ақсуат пен Ақжардағы оңалту орталықтарының әрқайсысына ша­ғын автобус берілген. Сон­дықтан, оңалту мекемесіне сол ауылдың балаларынан бөлек, ма­ңайдағы елді мекендердің де емді қажет ететін бүлдіршіндерін көлікпен алып келіп, 6 сағаттан кейін қайтадан үйіне жет­кізіп, ата-аналарына табыс етуге жағдай жасалып отыр. Біз ауыл тұрғыны Динара Кә­кімбекованы сөзге тартқан едік. Орталыққа алты жастағы Марғұлан Жеңісбеков есімді бүлдіршінін алып келген ананың айтуынша, баласы екі жыл бұрын инсульт алып, өздігінен жүре алмай қалған және бір қолы жұмыс істемейді. Бір жыл бұрын Астанадағы балаларға арналған оңалту орталығына барып келгеннен кейін, ем-домды тағы да жалғастыруға мүмкіндігі бол­маған ана ауыл ішінде оңалту орталығының ашылып жатқанынан үлкен үміт күтетінін айтты. – Елордаға бару біз сияқты ауыл тұрғынына кәдуілгідей күш. Жол ұзақ. Бала да қажиды. Сондықтан, мемлекетіміздің ауылда күнде­лік­­ті ем алуға жағдай жасағаны­на қуа­­­ныш­­тымыз. Енді баламыздың денсаулығы жақсарады деген ойдамыз. Мұнда балаларды физикалық тұрғыдан дамытуға қажетті жағ­дайдың барлығы жасалған екен, – деді Динара Ахметқызы. Сөз соңында аудан әкімі Діл­дәбек Оразбаев Ақжар ауылында биыл жаңа мектеп пен ауыз су жүйесінің пайдалануға берілетінін, сонымен бірге облыс әкімінің тапсырмасы бойынша үштұғырлы тілді дамыту бағдарламасы аясында ағылшын тілін тереңдетіп оқыту орталығы мен ментальды математика мектебі ашылатынын атап өтті. Думан АНАШ, «Егемен Қазақстан». Шығыс Қазақстан облысы, Тарбағатай ауданы.