Инновациялық ортаны дамыту тәсілдері

қазақстандық мемлекеттік қызметкерлер назарына ұсынылды Астанадағы мемлекеттік қызмет саласындағы өңірлік хаб БҰҰ-ның Даму бағдарламасымен бірлесе отырып, жауапты мемлекеттік қызметшілеріне арналған «Инновациялық ортаны ілгерілету» тақырыбында семинар өткізді. Оған Инвестициялар және даму министрлігі, Ұлттық экономика министрлігі, Білім және ғылым министрлігінің инновациялық даму мәселелерінен мамандар қатысты. Астанадағы мемлекеттік қызмет саласындағы өңірлік хаб басқарушы комитетінің төрағасы Әлихан Байменов пен Қазақстандағы БҰҰ Даму бағдарламасының тұрақты өкілінің орынбасары Мунхтуя Алтангерел семинарды ашып, жылы лебіздерін білдірді. Семинарда Даму бағдар­ламасының Еуропа және ТМД елдері бойынша Ыстамбұлдағы өңірлік орталығының инновациялар бойынша маманы Милица Бегович Ра­доевич пен халықаралық Nesta аға менеджері Джулио Куад­жиотто инновациялық ортаны құру және оны ілгерілету тәсілдерін, осы саладағы ғаламдық заманауи үдерістер туралы баяндады. Бұлардың соңғысы әлемнің көптеген мемлекеттеріне, оның ішінде Ұлыбританияның ұйымдары мен мемлекеттік мекемелеріне инновация бойынша кеңес беретін компания болып табылады. Семинарда инновациялық тенденциялар, оларды анық­тау жолдары мен даму мақ­сатында оларды қолдану, түр­лі бизнес-модельдерді тү­сі­ну, инновациялық қызмет түрі ретінде гранттар беру меха­низмдері, бағдарлама және жоба қызметінде инновациялық құралдарды қолдану тәсілдері талқыланды. Руслан ИГІЛІК.