Оралда жасөспірімдер Олимпиадасының жүлдегері марапатталды

ОРАЛ. 25 ақпан. Бүгін Батыс Қазақстан облыстық дене шынықтыру және спорт басқармасының басшысы Азамат Бекет Норвегияның Лиллехаммер қаласында өткен ІІ қысқы жасөспірімдер Олимпиадасында шорт-тректен қола жүлде алған Анита Нагайды қабылдады. Бұл туралы аталған басқарманың баспасөз қызметіне сілтеме жасаған egemen.kz тілшісі хабарлады. Шорт-тректен аралас командалық жарыс бойынша 6-топта сынға түскен жерлесіміз болгар қызы Катрин Манойлова, латыш спортшысы Карлис Крусбергс және жапониялық Казуки Йошинагамен бірге өнер көрсеткенін атап өткен жөн. Кездесу барысында Азамат Бекет жас спортшыға облыс атынан алғыс хат пен 300 000 теңгенің сертификатын табыс етті. Сонымен қатар, «1-наурыз – Алғыс айту күні» мерекесі аясында 2016 жылдың басынан үстел теннисінен, шорт-тректен, грек-рим күресі, әйелдер күресі, дзюдо, қазақ күресінен, гір көтеру спортынан, бокстан, велоспорттан халықаралық турнирлер мен ел чемпионаттарының жеңімпаздары мен жүлдегерлері де алғыс хаттар мен және бағалы сыйлықтармен марапатталды. Темір Құсайын. Дерек, сурет: Батыс Қазақстан облыстық дене шынықтыру және спорт басқармасы.