Өткен жылы Атыраудың аудандарында 600 пәтер пайдалануға берілді

АТЫРАУ. 26 ақпан. Атырау облысының аудандарында былтырғы жылдың аяғында 600 пәтер және әрқайсысында 1 пәтерлік 10 үй пайдалануға берілді. Бұл туралы Атырау облысының әкімі Бақтықожа Ізмұхамбетовтің мәлімдемесіне сілтеме жасаған egemen.kz тілшісі хабарлады. Еліміздің өзге өңірлері секілді Атырау облысында да тұрғын үй құрылысы қарқынды жүргізіліп келеді. Бір ерекшелігі, облыс орталығы – Атырау қаласында ғана емес, аудандарда да тұрғын үйлер салу қолға алынды. Еліміз тәуелсіздігін алғалы бері Атырау облысының аудандарында бірде-бір көп қабатты тұрғын салынбаған екен. «Бұрын-соңды болмаған жағдай, аудан орталықтарынан 600 пәтер тапсырылды. Аудандар орталықтары – Құлсары қаласы мен Индербор, Аққыстау және Ганюшкиннен үш қабатты 60 пәтерлік 9 үй салынып тапсырылды. Одан бөлек, Құлсарыдан басқа аудан орталықтарының бәрінен әрқайсы 1 пәтерлік 10 үйден салынды. Бұл жұмыс жалғасады. Мақат, Доссор, Индербор, Аққыстау, Ганюшкин және Махамбеттен 60 пәтерлік тағы алты тұрғын үйдің құрылысын NCOC компаниясының демеушілігімен биылғы алғашқы жарты жылдықта бастаймыз», – деп мәлім етті Атырау облысының әкімі Бақтықожа Ізмұхамбетов. Жолдасбек Шөпеғұл. Дерек: egemen.kz. Сурет: Рахым Қойлыбаев.