110 жасқа толған қария

ел игілігіне тілеуқор болып отыр Оңтүстік Қазақстан облысы, Созақ ауданы, Жартытөбе ауылы, Аққолтық елді мекенінде 110 жасқа толған Бейсен Рысымбетов деген ақсақал тұрады. Бір ғасырдан астам өмір сүрсе де, айтар сөзінен жаңылмаған қарияның туған күніне орай аудан әкімі Мақсат Исаев арнайы іздеп келіп, иығына шапан жапты. Әкімнің ниетіне разы болған ол: «Көзім нашарлап, құлағым ауырласа да, елдің, Елбасының амандығын тілеп, мемлекетіміздің жақсы тілеуқоры болып отырмын. Сен қарияны сыйласаң, ел сені сыйласын. Өрке­нің өссін», – деп бата берді. «Қариясы бардың қазынасы бар» деген. Ұрпақтарыңыздың берекесі болып, көз алдында аман-есен жүре беріңіз. Елімізде өзі­ңіздей сүйегі асыл, қазыналы қа­рия­ларымыз көп болсын, жасы­ңызды ұрпақтарыңызға бер­сін», – деді аудан әкімі. Бүгінде 110 жасқа келген ақса­қалдың жұбайы Жақсықыз Бегманова 75 жаста. Екеуі екі ұл, бес қыз сүйіп, олардан 32 немере, 22 шөпшек сүйіп отыр. Жас ал­шақтығына келсек, Бейсен ақсақалдың алғашқы жұбайы Тал­шыбық Танабайқызы құрсақ көтермегеннен кейін өзі рұқсатын беріп сол кездегі 16 жастағы өрім­дей қыз Жақсықызды алып берген екен. – Бисекеңнің жас кезінде сері, айтысқа түсер ақындығы да бол­ған, – дейді Жақсықыз апай. – Бәйбішесі Талшыбықпен тату-тәтті бір шаңырақтың астында жиырма жылға жуық бірге тұрдық. Ол кісі 1975 жылы дүниеден өтті. Отағасы 1960 жылдан бастап аттан түспей, түйе бақты. Тек 1990 жылдары таяғын інісі Әленге өткізді. Әуелі Алла, сосын осы шалымнын арқасында бала-шағаларымызбен ақар-шақар болып бақытты өмір сүріп жатырмыз, – дейді. Жүз он жасқа келсе де, немере, шөберелерінің атынан жа­ңылыспайтын қарияның ден­саулығы мықты болуының сырын немере інісі, ауылдық ауру­хананың бас дәрігері Мадияр Бей­сенбеков қымыран, шұбаттың шипасынан деп түсіндіреді. Сексен төрт жасқа дейін ат үстінен түспей, кеңшардың түйесін баққан ақсақалдың ең жақсы көретін қорегі шұбат болыпты. Туған күніне арнайы келген аудан әкімі бастаған азаматтарға қария батасын берді. Бақтияр ТАЙЖАН, «Егемен Қазақстан». Оңтүстік Қазақстан облысы.