Ескірмейтін естелік

«Ұлы Жамбыл – қазақтың дәс­түрлі әдебиетінің аса дарынды ас­қақ жа­ратылған алып өкілі». Бұл – ел Президенті Н.Ә.Назарбаевтың Жамбыл Жабаев жайлы пайымды пікірі. Шынымен, айтыс өнерінің ақтаңгері аса дарынды болмаса, ел есінде қалуы екіталай еді. Оның жалынды жырлары ұлт жадында жатталып, сана­сында сақталып тұрғалы қашан. Айшықты айтыстарының да алар орны айрықша. Жамбыл туралы кітаптар да аз емес, мақалалар да баршылық, ой-толғамдар да жетерлік. Ал Қазақстан Республикасының мәдениет қайраткері, Журналистер одағының мүшесі, фото­тілші Жақсылық Тұрлыбековтің ұлы ақынның 170 жылдығына ар­наған фо­тоальбомының өзіне тән ерекшелігі бар десек, артық айтқандық болмас, сірә. Оның ерекшелігі неде деп сұрайтын болсаңыз, онда автордың 20 жыл бойы тірнектеп жинақтаған еңбектері енгізілген. «ХХ ғасырдың Гомері» атанған ғаламат тұлғаның 150 жылдығы Мәскеуде, Франция, Түркия елдерінде тойланғаны белгілі. Сол жиындағы сәу­лелі сәттерден сыр шертетін суреттер альбомның ажа­рын еселей түскен. Айналасы он бес беттен тұратын фото­альбомның ішіне 200-ден астам сурет қам­тылған. Жырауға арналған шарапатты шаралар мен игілікке толы істердің ізін осы жинақтан қиналмай табасыз. Олардың қатарында 1996 жылы Елбасы Н.Ә.Назарбаевтың Жамбыл музейін ашу сәті, республикалық ақын­дар айтысы, сахна саңлақтарының қаты­суымен өткен әртүрлі ән кештері бар. Мызғымас тіршілікте мыңдаған, миллиондаған жақсы жандар туралы естеліктер естуге болады. Бірақ, оларды көзбен көру кез келгеннің еншісіне бұйыра бермейтін бақ. Ал осындай жақсы жандардың бейнесін бетпе-бет көріп, келбетін келешек ұрпаққа су­рет арқылы жеткізу Жақсылықтың тағ­­­­­­­­дырына жазылған екен. Алаштың бағына біткен асыл азаматтардың ойып тұрып орын алуы аталмыш альбомның қадір-қасиетін арттыра түскендей. Ав­тор­дың бұдан бөлек Абай Құнанбаев, Дінмұхамед Қонаев туралы және Қазақ хандығының 550 жылдығына арналған фотоальбомдары бар екенін естеріңізге саламыз. Бабаларын бағалайтын, өт­кенін саралайтын жандар үшін мұндай фотоальбомдар құнды құжат, таптырмас байлық, ескірмес естелік болары даусыз. Рауан ҚАЙДАР, «Егемен Қазақстан».