Науқанға байланысты жиын өтті

Кеше елордадағы Конгресс-Холл сарайында Астана қаласы аумақтық сайлау комиссиясы алдағы Парламент Мәжілісі және жергілікті мәслихаттар депутаттары сайлауына байланысты семинар өткізді. «Қазақстан Республикасы Пар­ламенті Мәжілісі депутат­та­ры­ның кезектен тыс және барлық деңгейдегі мәслихаттар депу­тат­та­ры­ның кезекті сайлауы ма­ңыз­ды саяси оқиға саналады. Бұл ретте сайлауды ұйым­дас­тыру­шы­ларға, оның ішінде сайлау үдерісіне қатысушыларға зор жауапкершілік жүктеледі», – деді жиын­ға қа­тысқан Орталық сайлау комис­сиясы төрағасының орынбасары Владимир Фоос. Сондай-ақ, ол сайлау комис­сия­ларының жергілікті атқарушы орган­дармен, үкіметтік емес ұйым­­дармен, азаматтық қоғам инс- титуттарымен, байқаушылар­мен және БАҚ өкілдерімен өзара іс-қимыл­дың тиімділігін арттыру мәсе­лесін де атап өтті. Оның атап өтуін­ше, бірлесе, жұмыла атқарған жұмыс­тар сайлау заңнамасы нормаларын сақтаудың бұлжымас шарты болып табылады. Содан кейін сөз алған Орталық сайлау комиссиясының мүшесі Марат Сәрсембаев бүгінгі күні ЕҚЫҰ/ДИАҚБ және ТМД мис­сияларынан, сонымен бірге, Ислам ынтымақтастығы ұйымы мен шет мемлекеттерден 155 бай­қау­шы, ал еліміздің Сыртқы істер министрлігі тарапынан 25 мемлекеттен шетелдік бұқаралық ақпарат құралдарының 105 өкілі аккредиттелгенінен хабардар етті. Семинарда сайлау науқанын материалдық-техникалық және құқықтық қамтамасыз ету мәсе­лелері де талқыланды. Әлисұлтан ҚҰЛАНБАЙ, «Егемен Қазақстан».