01 Наурыз, 2016

Ақсуаттағы алғашқы жекеменшік балабақша

241 рет көрсетілді
бб 106Таяуда Ақсуат ауылында «Ба­ла­­­пан» бағдарламасы аясында «Ақбота» балабақшасының жаңа ғимараты пайдалануға берілді. Жергілікті жас кәсіпкер Олжас Қа­лизада ашқан жекеменшік балабақша 75 балаға арналған. Жалпы, Тарбағатай ауданында балабақшамен қамтуға ауыл кә­сіпкерлерін тарту жұмыста­ры жоғары деңгейде жүргізіліп жат­­қанын байқадық. Бұл ретте мемлекет-жекеменшік әріптестігін дамыту бағдарламасының бала­бақшаға жеке инвестиция салуға ықпал етіп отырғанын айтқан аб­зал. Аталған жоба аясында ғи­марат салу және оны жабдықтау, жұмысты әрі қарай жүргізу кә­сіпкерге жүктелсе, балабақша қызметкерлерінің еңбекақысы мен коммуналдық шығыны мем­лекеттік қазынадан төленеді. Бұл мемлекет пен кәсіпкерлерге де, ата-аналарға да тиімді. – Бүлдіршіндерді мектепке дейінгі мекемемен қамту бойынша Тарбағатай ауданы облыс кө­лемінде алғашқы орында келеді. Соңғы екі жыл көлемінде ауданымызда 25 балабақша ашылса, оның ішінде 13 жекеменшік балабақша пайдалануға берілді. Елбасы Нұрсұлтан Назарбаев­тың тапсырмасы бойынша, мем­­лекет-жекеменшік әріптестігін дамыту аясында биыл тағы төрт балабақша салуды көздеп отырмыз. Яғни, бүлдіршіндерге арналған жаңа нысандар Қабанбай, Тұғыл, Қарғыба, Маңырақ ауылдарында бой көтереді. Бұл балабақшалар бүлдіршіндерімізді тәрбиелеп қана қоймай, жаңа жұмыс орындарын ашуға да септігін тигізіп отыр, – деді нысанның ашылуымен құттықтаған аудан әкімі Ділдәбек Оразбаев. Сондай-ақ, жергілікті бюджет қаржысымен Серіктестік ауы­лындағы балабақшаға кеңейту жұмыстары жүргізіліп, Көктүбек, Шорға елді мекендерінде жа­ңа ба­лабақшалар ашылмақ. Осы арқылы тарбағатайлық бүл­дір­шіндерді балабақшамен қамтуды толығымен шешу жоспарланған. Аудан әкімі салтанатты шарада Тұрсынхан Жүнісов және Фау­зия Рахимбаева сынды ауыл арда­герлерін «Еңбек ардагері» ме­да­лімен және жас кәсіпкер Олжас Қализаданы Алғыс хатпен марапаттады. Сексеннің сеңгірінен асқан Фаузия әже Ақсуатта 1938 жылы ашылған алғашқы балабақшаның түлегі екен. 1936 жылы аудан орталығы Қызылкесіктен Ақсуат ауылына көшірілді. Екі жылдан кейін Жамал Тоғанасова есімді апамыз Ақсуаттағы қазіргі «Береке» дүкенінің орнына төрт киіз үй тігіп, алғашқы балабақшаны ашты. 1937 жылы біріміздің әкемізді, біріміздің аға-бауырларымызды «үндемес» (НКВД) алып кетіп жатты. Сондай қиын кезеңде ата-анасыз қалған балалар бар, барлығы 20 шақты сәбиден құралған ал­ғаш­­қы балабақшаны ашқан қай­раткер апамыздың есімін бү­гінгі ұрпақ ұмытпауы тиіс. Сол киіз үйлердің бірі асхана, бірі ұл­дар­ға, бірі қыздарға арналған жатын бөлме болған еді. Ата-әже­леріміз қандай қиындық көрсе де қажырлы қайратымен сәбилерді қорғансыз қалдырған жоқ, деді өткен жылдарды еске алған 81 жас­­­тағы Фаузия әже. Сондай-ақ, бүгінгі бүлдіршіндерге бейбіт һәм бақытты өмір сыйлаған Елбасы сая­сатын айрықша бағалайтынын айтты. «Жас келсе – іске». Біз ақсуат­тық бүлдіршіндерге қуаныш сыйлаған Олжасты әңгімеге тартқан едік. Кәсіпкер 2013 жыл­дың қараша айында ашылған балабақшаның алғашқыда шағын ғимаратты жалға алғанын, кейін аудан әкімдігінің қолдауымен құрылыс жүргізгенін жеткізді. «Даму» қоры және «Жұ­мыспен қамтудың жол картасы-2020» бағдарламасы арқылы 15 миллион теңге жеңілдетілген несие қаражатына бой көтерген ғимараттың жалпы көлемі 550 шаршы метрді құрайды. Балабақша кең әрі жарық, бүлдіршіндерді тәрбиелеуге арналған заманауи құрал-жабдықпен толық қам­тылған. Кәсіпкер 20 адамға жұмыс беріп отыр. Олардың қа­тарында балалар дәрігері, психолог және әдіскер мамандар бар. Үш топқа бөлінген сәбилер төрт уақыт та­мақ­танады. – Балабақшамыздың ерек­шелігі, аптасына алты күн жұмыс істейді. Әлеуметтік баға ретінде бір күнге 350 теңге төлемақы белгіледік. Балабақшаға келмей қалған күндер есепке алынбай­тындықтан, ата-аналарға да же­ңіл. Сондай-ақ, үштұғырлы тіл бағдарламасы шеңберінде ағыл­шын, орыс тілдерін үйретеміз. Алдағы уақытта арнайы көлікпен балаларды өзіміз тасымалдауды жоспарлап отырмыз, – деді ол. Думан АНАШ, «Егемен Қазақстан». Шығыс Қазақстан облысы, Тарбағатай ауданы.
Соңғы жаңалықтар

Алматы маңында жер сілкінді

Аймақтар • Бүгін, 16:18

Доллар 9 теңгеге арзандады

Қаржы • Бүгін, 16:10

Ұқсас жаңалықтар