Білікті заңгер, қарымды қайраткер

Елімізде қазіргі уақытта ерекше саяси науқан жүріп жатқаны белгілі. Уақыт талабына сай, жо­ғарғы заң шығарушы орган – Пар­ламенттің Мәжілісі және жер­гі­лікті сайланатын органдар – мәс­лихаттардың құрамы жаңар­тылмақ. Жоғарғы органға депутаттар пар­тиялық тізімдер арқылы сай­ланатын болса, мәслихат депу­тат­тығына кандидат болып, қо­ғамдық ретте жұмыс атқаруға, ұжым­дардың ұсынысы мен аза­мат­тардың жеке өзін өзі ұсыну арқылы тіркелетіні белгілі. Қазіргі кезеңде депутаттыққа ел қамын ойлайтын, күрмеуі қиын мәселелердің шешімін таба білетін, білімді де білікті азаматтар келгені ләзім екенін өмірдің өзі көрсетіп отыр. Ондай азаматтар арамызда аз емес, соның бірі Республикалық ардагерлер ұйымы Орталық кеңесінің Төралқа мү­шесі, «Жеті жарғы» және Қожа­берген жырау» халықаралық қайы­рымдылық қорының төрағасы Бекет Тұрғараев. Бекет Тұрғараев 1947 жылы Оңтүстік Қазақстан облысы, Қазы­ғұрт ауданы Талдыбұлақ ауылында туған. 1974 жылы Қазақ мем­лекеттік университетінің заң факультетін бітіргеннен соң елі­міздің сот саласында ұзақ жылдар абыройлы қызмет атқарды. Еңбек жолын облыстық соттың тәлімгерінен бастап, Оңтүстік және Солтүстік Қазақстан облыс­тық соттарының төрағасы қыз­меттеріне дейін көтерілді. «Қазақ­станның еңбек сіңірген заңгері», республиканың «Құрметті судьясы» атақтарының, «Алтын барыс» омырау белгісінің, «Құрмет», «Парасат» ордендерінің иегері атанды. Солтүстік Қазақстан облысында он жыл қызмет атқарған жылдары өзінің негізгі қызметінен тыс «Мәдени мұра» бағдарламасын іске асыруда қоғамдық-мәдени сала бойынша қыруар жұмыстар атқарды. 2010 жылы еңбек демалысына шыққаннан кейін қоғамдық-мәдениет саласында да өнегелі еңбек жасады. Оның ішінде Пір Бекеттің 260 жылдығына орай «Ел иесі, жер иесі Пір Бекет» ат­ты халықаралық конференция­ны жоғарғы дәрежеде өткізді. Соның нәтижесінде «Бекет ата-260» деп аталатын ғылыми-танымдық кі­тап шы­ғарылып, республиканың мә­­­дени ошақтары арқылы көпшілік оқыр­манға кең таралды. Б.Тұрғараев Жаңаөзен оқи­ға­сына байланысты құрылған рес­публикалық қоғамдық комис­сия­ның жұмысына белсенді араласып, білікті заңгер ретінде лайықты үлес қосты. «Жеті жар­ғы» және Қожаберген жырау» халықаралық қоғамдық қайы­рымдылық қорын құрып, бір­талай игі істердің ат­қарылуын қам­тама­сыз етті. Оның ішінде Қожаберген То­лы­байсыншыұлының 350 жыл­дығына орай Алматы және Ас­­тана қала­ларында халықаралық қо­ғамдық конференциялар өткізіп, қо­ры­­тындысы бойынша «Мәңгілік елдің мәң­гілік жыршысы» атты көркем бе­зендірілген ғылыми танымдық кі­тап және Қазақстан Республикасы Конституциясының 20 жылдығына орай «Президент және құқықтық реформа», «Сал­танат» атты көлемді кітаптар шығарды. «Ұлы Жеңістің 70 жылдығы қарсаңында Қазығұрт ауданында «Бабалар рухына тағзым» кешенін салтанатты түрде ашып, сол мекеннен соғысқа аттанып елге орал­маған 384 боздақтың аты мәрмәр тасқа жазылып, мәңгілік алау оты жағылып, «Ерлер есімі ел есінде» деген 21 метрлік алып монумент тұрғызылды. Б.Тұрғараев Республикалық ардагерлер ұйымы Орталық ке­ңесінің, оның Төралқасының мү­шесі ретінде бірталай жұмыстар атқаруда. Ол жастарға патриоттық тәрбие беру тұрғысында көпте­ген оқу орындарында жет­кін­шектермен кездесіп, құқықтық реформалар тұрғысынан салиқалы да салмақты әңгімелер өткізді. Соғыс ардагерлері мен тыл еңбеккерлері арасында да жиі кездесулер өткізіп, ақсақалдардың мұң-мұқтажын тыңдап, ол қиындықтардың тындырымды шешілуіне ықпал жасауда. №21 сайлау округі бойынша Оңтүстік Қазақстан облысының мәслихатына депутат болып тір­келген Бекет Тұрғараев мырза сөзі мен ісі алшақтамайтын жан. Ол ел қамын ойлай білетін, білімі, тәжі­рибесі, қайрат-жігері мол, алдына қойған мақсат-мәселелерді шеше алатын азамат. Өмірзақ ОЗҒАНБАЕВ, Республикалық ардагерлер ұйымы Орталық кеңесінің төрағасы. Жарияланым ақысы депутат­тыққа кандидаттың жеке сайлау қорынан төленді.