Отырыстың күн тәртібі келісілді

Сенат бюросы жоғарғы палатаның 2016 жылғы 17 нау­рызда болатын кезекті отырысының күн тәртібін келісті, деп хабарлады Палатаның баспасөз қызметі. Сенаторлар Қазақстан мен Кореяның Үкіметтері ара­сындағы Кореядағы Қазақ­стан азаматтарының және Қазақ­стандағы Корея азаматтарының ішкі корпоративтік ауысулар шең­беріндегі уақытша еңбек қызметі туралы келісімді; Азаматтық немесе сауда істері бойынша шетелде дәлелдемелерді алу туралы конвенцияны; Балаларға али­менттерді және отбасын күтіп-ба­ғудың басқа да нысандарын өндіріп алудың халықаралық тәрті­бі туралы конвенцияны және Али­менттік міндеттемелерге қол­данылатын құқық туралы хаттаманы; Қазақстан мен Норвегия арасындағы адамдардың реадмиссиясы туралы үкіметаралық келісімді ратификациялау туралы заң жобаларын қарайды. Палата «Пошта туралы», «Лотерея және лотерея қызметі туралы» заң жобаларын да қарайтын болды. Заңнамаға баланың құқықтарын қорғау; пошта; лотереялар және лотерея қызметі; Қазақстанның «жасыл экономикаға» көшуі; экология; тұтынушылардың құқықтарын қорғау; астық нарығын реттеу мәселелері бойынша түзетулер бірінші оқылымда қаралатын болып шешілді. Заңнамаға мемлекеттік қыз­меттер көрсету және мұнай өнім­дерінің жекелеген түрлерін өнді­руді және олардың айналымын мемлекеттік реттеу мәселелері бойынша түзетулер екінші оқы­лымда талқыланады.