15 Наурыз, 2016

Бос құтылар кәдеге жарамақ

793 рет
көрсетілді
1 мин
оқу үшін
iҚостанай қаласында қоқысқа тасталған пластикалық құтылар қайта өңделетін болды. Бұл – бастама қоршаған ортаға залал келтіріп, бей-берекет шашылып жатқан бос құтылардан арылудың тиімді жолы. Бүгінде Қостанайда қоқыс жәшік­терінің қасына темір тор қорап­тар қойылды. Оларға тек плас­тикалық бөтелкелер салынады. Ал бос ыдыстардың қайта өңделетінін естіген жұрт қуанып жүр. Ең бас­тысы, олар шашылып жататын құтылардан құтылатынына дән риза. – Өте жақсы бастама. Қажетсіз қоқыс бір бөлек, пластикалық ыдыс­тар бір бөлек жиналады. Олар қайта өңделіп, пайдалы затқа айналады. Осы арқылы тазалық та сақталады, экологиялық зиян да жойылады, – дейді қала тұрғыны Нина Сигуева. Айта кетейік, қазіргі таңда мұн­дай ыдыстар Қостанайда 85 жерде бар. Жергілікті билік өкілдері жыл соңына дейін қаладағы барлық 484 қоқыс жиналатын орынды түгел қамтуды көздеп отыр. Мұнда бұл жұмыстар биылғы ақпан айында қолға алынды. Мамандардың мәліметінше, жи­налған құтылар іріктеліп, Ақтөбеге жіберіледі. Ол жерде қайта өңдеуден өткен пластикалық ыдыс­тардан бас­қа заттар мен құрылыс материал­дары жасалады. Осы кезге дейін жиналған үш тоннаға жуық пластикалық құтылар Ақтөбеге жөнелтілген екен. Төребек ТҰРМАНОВ.