15 Наурыз, 2016

Бақытын еңбектен тапқан

482 рет
көрсетілді
3 мин
оқу үшін
Сурет , Тамара СайтиеваӘрбір кәсіпорында өзінің кәсібіне адал, ісіне берілген, өзі еңбек еткен ортамен біте-қай­насып кеткен адамдар болады. Олардың өзі жұмыс іс­тейтін кәсіпорынға екінші үйін­дей бауыр басып кететіні де сон­дық­тан. Еу­разиялық топқа кіретін «Қазхромда» да мұндай жұмысшылар аз емес. Олардың бірі – Ақтөбе ферроқорытпа зау­ы­ты өтім бөлімінің жүкті қа­былдап-тапсырушысы Тамара Сайтиева десек, артық айтқан­дық бола қоймас. Туабітті қасиетпен үнемі жадырап, жарқылдап, кү­лімдеп жүретін ол, қарап отыр­са, зауытқа өз өмірінің 30 жылын арнаған екен. Тамара Сайтиева зауытта 1982 жылдан бері жұмыс істейді. Осыдан тура отыз жылдан астам уақыт бұрын теміржол цехының жергілікті паркінің операторы болып еңбек жолын бастаған-ды. Зауытқа жұмысқа тұруға оған осын­да жұмыс жасайтын апасы кеңес берген болатын. Міне, содан бері кәсіпорында табан аудармай еңбек етіп келеді. 2007 жылы оны теміржол цехы кәсіподақ комитетінің төр­айы­мы етіп сайлады. Енді күнделікті өндірістік тапсырмалармен қоса цехтағы әріптестеріне әлеуметтік қолдау көрсету бо­йынша міндет де қосылды. Әрине, әріптестерінің қауіпсіз еңбек етуі үшін еңбекті қорғау бойынша кәсіби тұрғыда және кәсіподақ бойынша да оң көзбен қарау, мұқият қадағалау қажет болды. Цех ұжымының ынтымағы мен өндірістік табыстары да цехтық кәсіподақ комитетінің жүйелі жұмысына тәуелді. Бір сөзбен айтқанда, мұнда ол араласпайтын мәселе жоққа тән. Қашанда қарақан басынан гөрі өзгенің жүзі жарқын болуына ұмтылатын Тамараның осы болмыс-бітімі оны өз ортасына сыйлы етті. Әріп­тестері оны «Біздің Тома» деп жандарына жақын тарта атауы да сондықтан. – Меніңше, әрбір адам өз кәсібін жүрегімен ұнатып, жақсы көруі тиіс. Менің сүйікті кәсібім қиын әрі жауапкершілікті талап етеді. Мен мұнда көптеген жақсы адамдармен достастым. Менің жұмысым – менің өмірімнің айнасы, өйткені, осында еңбек ете жүріп, өзімнің өмірлік серігімді кездестірдім, үш бөлмелі пәтерге қол жеткіздім. Демалыс күндері көп нәрсені істеуге үлгере алмай жатамын, дегенмен, уақытым­ның негізгі бөлігін отбасыммен өткіземін. Жазда бәріміз сая­жайда демалуды ұнатамыз. Көк­өніс, жеміс-жидектің түр-түрін өсіріп, қыстың қамын жасаймыз. Өсіп келе жатқан сүйікті не­мерелерімнің тәрбиесімен ай­налысу мені ерекше бақытқа бөлейді, – дейді Тамара Сайтиева. Өндіріс озаты еңбектегі табысы үшін бірнеше рет Алғыс хаттармен және Құрмет грамоталарымен және үшінші дәрежелі «Еңбек даңқы» белгісімен мара­патталған. Сатыбалды СӘУІРБАЙ, «Егемен Қазақстан». Ақтөбе облысы.