Шағым-ескертпелер түскен жоқ

20 наурызға белгіленген Парламент Мәжілісі және барлық деңгейдегі мәсли­хаттар сайлауына тәуелсіз бақылау жүргізу мақсатымен республикалық қоғам­дық комиссия құрылған болатын. Осы комиссияның жергілікті жерлердегі құзі­ретін атқару міндеті әр облыстағы арнайы орталықтарға жүктелгені белгілі. Маңызды саяси науқанға тәуелсіз байқаушы ретінде қатысқан тұлға­лар кімдер болуы тиіс? Қанша адам байқаушы ретінде қатысты деген сауалдарымызды Сай­лауды байқау жөніндегі республикалық комиссияның Батыс Қазақстан облысы бойынша өңірлік орталығының төрайымы Вера ШОХИНАҒА жолдаған едік. – Вера Кузми­нич­на, сай­лауға тәу­елсіз байқаушы ре­тінде тартылған адам­ға қан­дай талаптар қойылды? Осы жө­нінде толығырақ айтып берсеңіз. – Сауалыңыз орын­ды. «Сайлау туралы» ҚР Заңының 20-1-бабына сәйкес, тәуелсіз байқаушыға қойылатын талаптар бар. Оны өзіңіз бі­лесіз. Заңға сәйкес, мем­ле­кеттік қыз­меткерлер, бел­гілі бір пар­тияның штабын­да жұмыс істейтіндер, депу­таттыққа канди­даттардың үгіт-насихатын жүр­гізетін во­лонтерлер тәуелсіз сарапшы бола алмайды. Ал заңда көрсетілген талаптар мен шектеулерден ада, қоғамдағы түрлі құбылыстарға сергек қарап, азаматтық ұстанымын еркін біл­діретін кез келген бел­сенді азамат тәуелсіз бай­қаушы бо­ла алады. Біз де осы бағытта жұмыс іс­­­тедік. Сайлау күні байқаушыларымыз ти­істі учаскелеріне барды. Арнайы бел­гі­ленген орында отырып, сайлаудың өту барысын қа­дағалап, бюллетеньдерді санауға, хаттаманы толтыруға қатысты. Соңынан хаттаманың бір данасын біздің орталыққа әкеліп тапсырды. – Жалпы, сонда облыста қанша тәуелсіз байқаушы жұ­мыс істеді? – Батыс Қазақстан облысы бойынша сайлаудың өту барысын 520 тәуелсіз бай­қаушы қадағалады. Оның 117-сі Орал қаласының сайлау учаскелерінде болды. Бір айта кетерлігі, би­ылғы бай­қаушылардың негізгі құ­рамы өткен Президент сайлауына қатысып, үлкен тә­жірибе жинақтаған азаматтардан тұр­ды. Сайлау алдында бай­қаушылар үшін арнайы семинар-тренингтер өткізілді, мақсат-міндеттері түсіндірілді. Қолдарына бай­қаушы куәлігі, электронды және қағаз нұсқада байқаушы күнделігі берілді. Сайлау қоры­тындысында біздің бай­қаушылардың жұмысына қатысты ешқандай шағым-ескерт­пе түскен жоқ. Жазып алған Темір ҚҰСАЙЫН, «Егемен Қазақстан». Суретті түсірген Рафхат ХАЛЕЛОВ.