22 Наурыз, 2016

Үлкен сенімнің белгісі

325 рет
көрсетілді
2 мин
оқу үшін
Без имени-15Мен Ресейдің Макушино ауданында тұрамын. Біраз уақыт кеңшар, шаруа қожа­лығын басқардым. Зейнетке шықсам да, қоғамдық жұмыстарға белсене қатысамын. Бірқатар туыстарым Қызылжар өңірінде тұратындықтан, жиі араласып тұрамыз. Қазақстанда өтетін Парламент Мәжілісі мен түрлі деңгейдегі мәслихаттар депутаттарын сайлауға қатысу туралы өтініш түскенде бірден келістім. «Мың естігеннен бір көрген артық» демекші, жақсы өнегелерден тағы­лым алып, тәжірибеде қолданғанның еш артықшылығы жоқ. Қорған облысынан ТМД миссиясының атынан 12 байқаушы келіп, саяси науқанға бастан-аяқ қатысу мүмкіндігіне ие бол­дық. Қызылжар ауданының сайлау учас­ке­лерін аралап, дайындық жұмыстың нәти­желерімен таныстық. Азаматтардың еркін қалауын білдіруге барлық жағдайдың жасал­ғанын, дауыс беру үдерісінің биік деңгейде өткерілгенін, «ҚР Сайлау туралы» Заң талаптары мүлтіксіз сақталғанын көзбен көрдік. Елді мекендердің қашықтығына қарамастан, қатынауда еш іркілісті байқамадық. Мерекелік көңіл-күйдегі қазақстандықтардың шат жүзін көріп, әлеуметтік-тұрмыс жағдайлары қалыпты екен деген ой түйдік. Ауылдықтардың қолы­нан Наурыз көженің дәмін татып, емен-жарқын әңгімеміз жарастық тапты. Қария­ларға дейін «төскейде малы, төсекте басы қосылған» екі елдің достығын тілеп, Тәуел­сіздіктің арайлы таңына аман-есен жеткен­деріне шүкіршілік етеді. Түрлі қоғамдық ұйымдар мен бірлес­тіктердің жүргізген сауалнама­лары­мен, ал­дын ала жариялаған қоры­тынды­лары­мен таныса отырып, ел арасында «Нұр Отан» партиясының бедел-абыройы зор екенін атап көрсеткім келеді. Мұның өзі халықты ортақ мақсатқа жұмылдырып, бағдар­ламалар мен тұғырнамалардың ойдағыдай орындалып жатқанын байқатса керек. Сайлау қорытындысы бойынша 82 пайыз дауыс жинауы – үлкен сенімнің белгісі.  Боранбай БИЖІГІТОВ, халықаралық байқаушы (Ресей). Солтүстік Қазақстан облысы. Суретті түсірген Талғат ТӘНІБАЕВ.