Қар суының қарғыны

Қостанай өңіріне қауіп төндіріп тұр Биылғы мешіннің мінезі Қостанайға жеңіл тиіп тұрған жоқ. Осы өңірдегі ақсақалдар өткен қыстағыдай көп қарды еске түсіре алмады. Әдетте, Тобыл өңі­рінде жауған қар жылда тобықтан төмен болмайтын. Дегенмен, осы қыста жауған ұлпаның сұрқы бөлек. Маман­дардың айтуынша, өткен жылдарға қарағанда, екі-үш есеге дейін көп түскен. «Наурыздың ақша қары» да, «құсқанаты» бір емес, бір­неше рет жауып кетті. Ен­ді ауа райын болжаушылар наурыз айының соңында жауған қардың аяғы жаңбырға ұласады деп отыр. Тобыл-Торғай өңірінде биыл су тас­қыны қаупі күшті. Облыстың оңтүс­тігіндегі Торғай өңірінде қар еріп, су тасып жатыр. Мамандар су­дың жайылғаны болмаса, аса қаупі жоқ екенін айтты. Ал облыстың солтүстік аудандары – Тобыл өңірінде қардың мұрты бұзылғанымен көбесі сөгілген жоқ, қарғын судың қоз­ғалысы баяу. – Қазір Қаратомар су қой­­масына секундына 50 текше метр су жіберіп жатырмыз. Бұл су қоймасында 470 миллион текше метр су сиятын орын бар. Гидро­логтар да биылғы қар суы­ның көлемі осы шама­лас екенін айтуда. Қар кө­бесі сөгіліп, қар­ғынның қозға­лысы күшейген кезде су қоймасына секун­дына 100 текше метрге дейін су кете­тін болады. Су тасқыны қау­­пі де сол кезде күшейе тү­седі, – дейді Ауыл ша­руа­­шылығы министрлігі су ресурс­тары комитетінің «Қаз­сушар» шаруа­шылық жүр­гізу құқығындағы рес­пуб­ликалық мемлекеттік кә­сіпорны Қостанай филиалы директорының орынбасары Жамбылбек Райымқұлов. Ал Қостанай қаласына көктем ертерек келген секілді. Қаланың іші дел-сал еріп жатыр. Қостанайдың кейбір көшелерінде, шағын тұрғын аудандарда еріген қар суынан адамдардың жүріс-тұрысы қиындаған. Техникалар барынша бөлініп, әлі де қар шығару жұмыстарымен айналысуда. Наурыз айының ортасынан бастап қаладан 40 мың текше метр қар сыртқа тасылды. Ауа райын болжаушылар Тобыл өңірінде «сәуір болмай тәуір болмайтынын» айтты. Нәзира ЖӘРІМБЕТОВА, «Егемен Қазақстан». ҚОСТАНАЙ.