30 Наурыз, 2016

Елді мекендердегі емдеу мекемелері

364 рет
көрсетілді
2 мин
оқу үшін
елді мекенде дәрігерлік амбулаторияҚарағанды облысындағы Абай және Бұқар жырау аудан­дарындағы екі елді мекенде дәрігерлік амбулатория­лар ашылды. Бұл медициналық нысандардың әрқай­сы­сының құрылысына 2015 жылы облыс бюджетінен  51 мил­лион 598 мың теңгеден қаржы бөлінген болатын. Абай ауданына қарасты Құрма ауылындағы денсаулық сақтау бекеті  бұрын тұрғын үйдің бірін­ші қабатында орналасқан еді. Оның бөлмелері де санитарлық-гигиеналық талаптарға сай келмей­тін. Ал Бұқар жырау ауданындағы Баймырза ауылының дәрігерлік нысаны бұрынғы музыкалық мектеп ғимаратында орналасып, қажетті жағдайларсыз жұмыс істеп келген болатын. Бүгінгі күнде жаңа ғимараттар санитарлық стандарттарды сақтай отырып салынған және де қа­жетті медициналық құрал-жабдықтармен толық қамтамасыз етілген. Негізінде жаңа дәрігер­лік амбулаториялардың «350 дә­рігерлік амбулатория, фельд­шерлік-акушерлік бекеттер және емханалар» жобасы аясында са­лын­ғанын да айта кеткен жөн. «Елбасы Нұрсұлтан Әбішұлы Назарбаевтың тапсырмасын орындай отырып, жергілікті билік органдары біздің азаматтардың өмір сүру сапасын арттыру үшін қажетті жағдайдың бәрін жасауда.  Бұл айтып отырған әңгімеміздің тұрғындарды жайлы баспанамен қамтамасыз етуге, жалпы білім беру және балалар бақшалары жүйесін дамытуға, түрлі әлеуметтік маңызы зор ғима­раттарға, оның ішінде денсаулық сақтау саласындағы нысандарға да қатысы бар», – деді дәрігерлік нысандардың ашылу салтанатында құттықтау сөз сөйлеген облыс басшысы Нұрмұхамбет Әбдібеков. Өңір басшысы ағымдағы жылы облыста 27 жаңа дәрігерлік амбулаторияны пайдалануға беру жоспарланғанын атап өтті. Со­ны­мен қатар, ол күрделі жөн­деуден кейін облыстық клиникалық ау­рухананың  хирургиялық кор­­пу­сының ашылғанын айтты. Сон­дай-ақ, мемлекет-же­ке­мен­шік әріптестігі аясында диаг­нос­тикалық ультрадыбыстық зерт­теудің үш бөлмесі ашылып, жұ­мыс істей бастаған. Ал Теміртау қаласында Мақажанов атындағы клиниканың филиалы құрылып, пайдалануға берілді. Жалпы, өңір­де денсаулық сақтау нысандарын жөндеу жұмыстарына облыс бюджетінен 800 миллион теңге қаржы бөлінген. Қайрат ӘБІЛДИНОВ, «Егемен Қазақстан». Қарағанды облысы.